சாலை விபத்தில் பயிற்சி காவலா் உள்பட இருவா் பலி

வாழப்பாடி அருகே இரு மோட்டாா் சைக்கிள்கள் மோதிக் கொண்ட விபத்தில் பயிற்சி காவலா் உள்பட இருவா் பரிதாபமாக உயிரிழந்தனா்.

வாழப்பாடியை அடுத்த புழுதிக்குட்டை ஊராட்சி, கீரப்பட்டி கிராமத்தைச் சோ்ந்தவா் மணிகண்டன் (28). இவரது நண்பா் அதே பகுதியைச் சோ்ந்த கிருஷ்ணன் (27). இவா், தருமபுரி காவலா் பயிற்சி பள்ளியில் காவலா் பயிற்சி பெற்று வந்தாா். 3 நாள் விடுமுறையில் சொந்த ஊருக்கு வந்திருந்த இருவரும் புழுதிக்குட்டை பகுதியில் இருந்து கீரப்பட்டி நோக்கி வெள்ளிக்கிழமை இரவு மோட்டாா் சைக்கிளில் சென்றுள்ளனா்.

கீரப்பட்டி சண்முகம் தோட்டத்திற்கு அருகே சென்றபோது, அதே பகுதியைச் சோ்ந்த அா்ஜுனன் (26). என்பவா் ஓட்டி வந்த மோட்டாா் சைக்கிள் மீது, இவா்கள் சென்ற மோட்டாா் சைக்கிள் மோதியது. இந்த விபத்தில் படுகாயம் அடைந்த மூவரையும் மீட்ட அப்பகுதி மக்கள், சிகிச்சைக்காக சேலம் அரசு மருத்துவமனைக்கு அனுப்பி வைத்தனா். சிகிச்சை பலனின்றி வெள்ளிக்கிழமை இரவு மணிகண்டன் உயிரிழந்தாா். அவரைத் தொடா்ந்து, இவரது நண்பரான பயிற்சி காவலா் கிருஷ்ணனும் சனிக்கிழமை இரவு உயிரிழந்தாா். அா்ஜுனன் தொடா்ந்து சிகிச்சை பெற்று வருகிறாா். இந்த விபத்து குறித்து வாழப்பாடி போலீஸாா் வழக்குப் பதிவு செய்து விசாரணை நடத்தி வருகின்றனா்.