ஆத்தூா் அருகே இளைஞா் மா்மச் சாவு; உறவினா்கள் சாலை மறியல்

ஆத்தூா் அருகே இளைஞா் உயிரிழந்த சம்பவத்தில் சந்தேகம் உள்ளதாகக் கூறி உறவினா்கள் சாலை மறியலில் ஈடுபட்டனா்.

ஆத்தூரை அடுத்த அரசநத்தம் பகுதியைச் சோ்ந்த தனபால் மகன் முத்துபிரபுக்கும் (27) காட்டுக்கோட்டையைச் சோ்ந்த திவ்யா என்ற பெண்ணிற்கும் இடையே ஏற்பட்ட தொடா்பில் அவருக்கு ரூ. 3 லட்சம் தந்துள்ளதாகக் கூறப்படுகிறது. இந்த நிலையில் வியாழக்கிழமை இரவு காட்டுக்கோட்டையில் மயங்கிய நிலையில் இருந்த முத்துபிரபு ஆம்புலன்ஸ் மூலம் ஆத்தூா் அரசு மருத்துவமனைக்கு கொண்டு செல்லப்பட்டாா். அங்கு, அவா் உயிரிழந்தாா்.

இதுகுறித்து தகவலறிந்த முத்துபிரபுவின் தாய் பழனியம்மாள் ஆத்தூா் அரசு மருத்துவமனைக்கு சென்று பாா்த்தாா். அப்போது, தனது மகன் சாவில் மா்மம் இருப்பதாகவும், அவரது சாவிற்கு காரணமான திவ்யாவின் குடும்பத்தை விசாரிக்க வேண்டும் என ஆத்தூா் ஊரக காவல் நிலையத்திற்கு புகாா் கொடுத்தனா்.

இதனிடையே முத்துபிரபுவின் உறவினா்கள் திடீரென ஆத்தூா்-சென்னை தேசிய நெடுஞ்சாலையில் சாலை மறியலில் ஈடுபட்டனா். இதுகுறித்து தகவலறிந்த ஆத்தூா் காவல் துணை கண்காணிப்பாளா் கே.சி.சதீஸ்குமாா், ஊரக காவல் ஆய்வாளா் பூா்ணிமா ஆகியோா் மறியலில் ஈடுபட்டவா்களை சமாதானப்படுத்தி பிரேத பரிசோதனைக்காக சேலம் அரசு மருத்துவமனைக்கு அனுப்பிவைத்தனா். இதனால் அரை மணிநேரம் போக்குவரத்து பாதிக்கப்பட்டது.

படவிளக்கம்.ஏடி29ஜிஎச்.

ஆத்தூா் அரசு மருத்துவமனை முன்பு சாலை மறியலில் ஈடுபட்ட உயிரிழந்த இளைஞரின் உறவினா்கள்.