போலி பத்திரப் பதிவு செய்யும் அதிகாரி மீது நடவடிக்கை: அமைச்சா் பி.மூா்த்தி

போலி பத்திரப்பதிவு குறித்து ஆதாரங்களுடன் புகாா் அளித்தால் சம்பந்தப்பட்ட அதிகாரி மீது உடனடி நடவடிக்கை எடுக்கப்படும் என்று பத்திரப்பதிவுத் துறை அமைச்சா் பி.மூா்த்தி தெரிவித்தாா்.

சேலம் மாவட்டம் ஓமலூா், மேச்சேரி சாா் பதிவாளா் அலுவலகங்களில் வணிகவரித் துறை, பதிவுத் துறை அமைச்சா் பி.மூா்த்தி வியாழக்கிழமை ஆய்வு மேற்கொண்டாா். அலுவலக கோப்புகளைப் பாா்வையிட்ட அவா் அங்கு பொதுமக்களுக்கு செய்யப்பட்டிருக்கும் அடிப்படை வசதிகளைப் பாா்வையிட்டாா்.

பின்னா் செய்தியாளா்களிடம் அமைச்சா் பி.மூா்த்தி கூறியதாவது:

வணிகவரி மற்றும் பதிவுத் துறையின் சேவைகள் பொதுமக்களுக்கு எளிதாக கிடைக்கும் வகையில் பல்வேறு சீா்திருத்தங்கள் செய்யப்பட்டு வருகின்றன. பத்திர பதிவுத் துறை அலுவலகங்களில் நடைபெறும் பதிவுப் பணிகளில் வெளிப்படைத் தன்மையை உறுதி செய்திடும் நோக்கில் கண்காணிப்பு நடவடிக்கைகள் தீவிரப்படுத்தப்பட்டுள்ளன. பொதுமக்களுக்கு பட்டா வழங்குவதிலும், பட்டா மாறுதல் செய்வதிலும், பொதுமக்களின் கோரிக்கைகள் மீதும் காலம் தாழ்த்தாமல் நடவடிக்கை மேற்கொள்ள வேண்டும் என்று அலுவலா்களுக்கு அறிவுறுத்தப்பட்டுள்ளது.

பத்திரப் பதிவு அலுவலகங்களில் போலி பத்திரப் பதிவு குறித்து ஆதாரத்துடன் புகாா் அளித்தால் சம்பந்தப்பட்ட அதிகாரிகள் மீது உடனடியாக நடவடிக்கை எடுக்கப்படும்.

ஒரு மாவட்டத்தின் பத்திரப் பதிவுகளை அதே மாவட்டத்தில் பதிய நடவடிக்கை மேற்கொள்ளப்பட்டு வருகிறது. மக்கள்தொகை அதிகமுள்ள வட்டாரங்களில் கூடுதல் சாா்பதிவாளா் அலுவலகங்கள் திறப்பது குறித்து பரிசீலிக்கப்படும். பத்திரப்பதிவு அலுவலகத்துக்கு வரும் பொதுமக்களுக்குத் தேவையான காத்திருப்பு அறை, இருக்கை வசதிகள், குடிநீா், மின்விசிறிகள் உள்ளிட்ட அடிப்படை வசதிகள் செய்யப்பட்டுள்ளதா என்பதை சம்பந்தப்பட்ட அலுவலா்கள் உறுதி செய்ய வேண்டும் என்றாா்.

ஆய்வின்போது பதிவுத்துறைத் தலைவா் தினேஷ் பொன்ராஜ் ஆலிவா், கூடுதல் பதிவுத்துறைத் தலைவா் சுதாமால்யா, மாவட்டப் பதிவாளா் கனகராஜ் உள்ளிட்ட அலுவலா்கள் உள்ளனா்.