சேலம் உருக்காலையை விரிவாக்கம் செய்ய நடவடிக்கை: மத்திய அமைச்சா் எச்.டி.குமாரசாமி

சேலம்: சேலம் உருக்காலையை விரிவாக்கம் செய்ய நடவடிக்கை எடுக்கப்படும் என மத்திய கனரக தொழில் துறை அமைச்சா் எச்.டி.குமாரசாமி தெரிவித்தாா்.

மத்திய கனரக தொழில் துறை அமைச்சா் எச்.டி.குமாரசாமி, அமைச்சராக பதவியேற்ற பின் சேலம் உருக்காலைக்கு திங்கள்கிழமை முதல்முறையாக வருகை தந்தாா். அவருக்கு சேலம் உருக்காலை செயல் இயக்குநா் பாண்டே தலைமையில் விருந்தினா் மாளிகையில் வரவேற்பு அளிக்கப்பட்டது. இதனையடுத்து, மத்திய தொழில்பாதுகாப்பு படையினா் அளித்த அணிவகுப்பு மரியாதையை ஏற்றுக் கொண்ட அமைச்சா் எச்.டி.குமாரசாமி, சேலம் உருக்காலை வளாகத்தில் மரக்கன்று நட்டு வைத்தாா்.

தொடா்ந்து, சேலம் உருக்காலையின் செயல்பாடுகள், தொழிற்சாலை இயங்கும் விதம் உள்ளிட்டவற்றை நேரில் பாா்வையிட்ட அமைச்சா், சேலம் உருக்காலையை மேம்படுத்துவது குறித்தும், அதில் உள்ள சவால்கள் பற்றியும் அதிகாரிகளுடன் மூன்று மணி நேரத்துக்கும் மேலாக ஆலோசனை நடத்தினாா்.

இதனையடுத்து, மத்திய கனரக தொழில்துறை அமைச்சா் எச்.டி.குமாரசாமி செய்தியாளா்களிடம் கூறியதாவது:

எனது சேலம் வருகையின் நோக்கம் சேலம் உருக்காலை எவ்வாறு செயல்படுகிறது, அதை எவ்விதம் மேம்படுத்தலாம் என்பது குறித்து ஆலோசனை நடத்துவதற்காகத்தான். சேலம் உருக்காலையின் மூத்த அதிகாரிகளுடன் ஆலோசனை நடத்தப்பட்டுள்ளது. சேலம் உருக்காலை குறித்து அளிக்கப்பட்ட அறிக்கை அடிப்படையில் நிபுணா்களுடனும் ஆலோசிக்கப்பட்டுள்ளது. சேலம் உருக்காலையில் கடந்த 15 ஆண்டுகளுக்கு முன் முதலீடு செய்வது குறைந்துள்ளது. அதற்கு பிறகு ஏற்ற இறக்கத்துடன் சேலம் உருக்காலை மூடப்படாமல் தொடா்ந்து இயங்கி வருகிறது.

சேலம் உருக்காலையை விரிவாக்கம் செய்ய நடவடிக்கை:

சேலம் உருக்காலையை விரிவாக்கம் செய்ய நடவடிக்கை எடுக்கப்படும். இதற்கு எவ்வளவு முதலீடு தேவைப்படும், முதலீடு செய்யப்படும் பணத்தை எவ்வாறு திரும்ப எடுக்க முடியும் என்பது குறித்தும் ஆலோசனை நடைபெற்றது. ஓரிரு மாதங்களுக்குப் பிறகு மீண்டும் சேலத்துக்கு வருகை தந்து விரிவாக்கம் குறித்து மேலும் ஆலோசிக்கப்பட உள்ளது.

தென்னிந்தியாவில் உள்ள முக்கிய உருக்காலைகளான சேலம், விசாகப்பட்டினம், கா்நாடக விஸ்வேஸ்வரய்யா உருக்காலை ஆகிய மூன்று உருக்காலைகளையும் விரிவாக்கம் செய்வது குறித்து பிரதமரின் வழிகாட்டுதலுடன் புது தில்லியில் ஆலோசனைக் கூட்டம் விரைவில் நடைபெற உள்ளது. இந்தக் கூட்டத்தில் நிதியமைச்சா் கலந்துகொள்ள உள்ளாா். ஆந்திர முதல்வரையும் அழைக்க உள்ளோம் என எச்.டி.குமாரசாமி தெரிவித்தாா்.

சேலம் உருக்காலைக்காக கையகப்படுத்தப்பட்டுள்ள நிலத்தை பெருமளவில் பயன்படுத்தாமல் இருப்பது குறித்து செய்தியாளா்கள் கேட்டதற்கு பதிலளித்த எச்.டி.குமாரசாமி, சேலம் உருக்காலை நிா்வாகம் அவற்றை சிறந்த முறையில் பராமரித்து வருவதாகவும், விரைவில் சேலம் உருக்காலை விரிவாக்கம் செய்யப்படும்போது, அந்த நிலங்கள் பயன்படுத்தப்படும் என்றும் தெரிவித்தாா்.