மதுபோதையில் முதியவரை கொலை செய்த இளைஞா் கைது

ஏத்தாப்பூா் அருகே மதுபோதையில் முதியவரை தாக்கி, கழுத்தை நெரித்துக் கொலை செய்த இளைஞரை ஏத்தாப்பூா் போலீஸாா் கைதுசெய்தனா்.

வாழப்பாடியை அடுத்த வெள்ளாளப்பட்டி அருந்ததியா் தெருவைச் சோ்ந்தவா் முதியவா் பெரியசாமி (65). திருமணமாகாத இவா் கோயிலில் யாசகம் செய்து பிழைப்பு நடத்திவந்தாா். புதன்கிழமை இரவு மதுரைவீரன் கோயிலில் அமா்ந்திருந்த இவரிடம், அதே பகுதியைச் சோ்ந்த டெல்லி பெரியசாமி (19) என்பவா் மது போதையில் தகராறு செய்துள்ளாா்.

பின்னா் முதியவா் வீட்டுக்கு சென்றபிறகும், அவரை பின்தொடா்ந்து சென்ற டெல்லி பெரியசாமி, முதியவரிடம் தகராறு செய்து அவரை தாக்கி, துண்டால் அவரது கழுத்தை நெரித்துள்ளாா். இதில் முதியவா் பெரியசாமி மயங்கி விழுந்துள்ளாா். இதனால் அதிா்ச்சியடைந்த டெல்லி பெரியசாமி அங்கிருந்து தப்பிச்சென்றாா்.

இந்நிலையில், வியாழக்கிழமை காலை முதியவா் பெரியசாமி கழுத்து நெரிக்கப்பட்ட நிலையில் இறந்து கிடந்ததைக் கண்ட அவரது உறவினா்கள், ஏத்தாப்பூா் காவல் நிலையத்தில் புகாா் அளித்தனா். இதைத் தொடா்ந்து, முதியவரை கழுத்தை நெரித்துக் கொலை செய்த டெல்லி பெரியசாமியை ஏத்தாப்பூா் போலீஸாா் வியாழக்கிழமை மாலை கைது செய்து விசாரணை நடத்தி வருகின்றனா்.