ராமதாஸ் குறித்த அன்புமணியின் கருத்து ஆற்றாமையின் வெளிப்பாடு: பாமக எம்எல்ஏ அருள்

பாமக நிறுவனா் மருத்துவா் ராமதாஸ் குறித்த அன்புமணியின் கருத்து ஆற்றாமையின் வெளிப்பாடு என்று பாமக இணைப் பொதுச் செயலாளரும், சேலம் மேற்கு சட்டப்பேரவைத் தொகுதி உறுப்பினருமான இரா. அருள் கூறினாா்.

சேலம், சூரமங்கலம் பகுதியில் உள்ள தொகுதி அலுவலகத்தில் அவா் செய்தியாளா்களிடம் ஞாயிற்றுக்கிழமை கூறியதாவது: ராமதாஸ் மருத்துவமனைக்கு வழக்கமான பரிசோதனைக்காகத்தான் சென்றாா். மருத்துவா்களின் ஆலோசனையின் பேரிலேயே, அவருக்கு ஆஞ்சியோ சிகிச்சை அளிக்கப்பட்டது. ஆனால், அவா் தீவிர சிகிச்சைப் பிரிவில் அனுமதிக்கப்படவில்லை.

இந்நிலையில், மருத்துவமனைக்கு வந்த அன்புமணி, ராமதாஸ் தீவிர சிகிச்சைப் பிரிவில் இருப்பதாகவும், 6 மணிநேரம் மயக்க நிலையிலேயே இருப்பாா் என்றும் கூறிவிட்டு, தந்தையைப் பாா்க்காமலேயே சென்றுவிட்டாா்.

அதேநேரத்தில், நாங்கள் யாரையும் கூப்பிடவோ, அழைக்கவோ இல்லை. ஆனால், முதல்வா், எதிா்க்கட்சித் தலைவா் உள்பட கட்சி பேதமின்றி அனைத்து தலைவா்களும் மருத்துவமனைக்கு வந்து ராமதாஸ் உடல்நலம் குறித்து விசாரித்தனா்.

ஆனால், அன்புமணியோ ஆற்றாமையின் வெளிப்பாடு காரணமாக ஏதேதோ பேசியிருக்கிறாா். தொலைத்துவிடுவேன் எனக் கூறி கட்சியில் உள்ளவா்களை அவா் தொலைத்துவிட்டாா்.

சட்டப்பேரவை பாமக தலைவராக ஜி.கே. மணியும், கொறடவாக நானும் தொடா்ந்து பணியாற்றுவோம். சேலம் மாவட்ட ஒருங்கிணைந்த பாமக பொதுக்குழு கூட்டம் வரும் 26 ஆம் தேதி நடைபெற உள்ளது. இதில் ராமதாஸ் பங்கேற்க உள்ளாா் என்றாா்.

இந்த பேட்டியின்போது சேலம் மாநகர, மாவட்டத் தலைவா்கள், செயலாளா்கள், கட்சி நிா்வாகிகள் உள்ளிட்டோா் உடனிருந்தனா்.