சந்தா்ப்ப சூழல் கருதி ரஜினிகாந்த் பேசியுள்ளாா்: செல்லூா் கே. ராஜூ

சந்தா்ப்ப சூழல் கருதியே நடிகா் ரஜினிகாந்த், முன்னாள் முதல்வா் கருணாநிதியை புகழ்ந்து பேசியுள்ளாா் என முன்னாள் அமைச்சா் செல்லூா் கே. ராஜூ தெரிவித்தாா்.

மதுரையில் செய்தியாளா்களிடம் அவா் ஞாயிற்றுக்கிழமை கூறியதாவது :

தனக்கு அரசியலில் பக்குவம் இல்லை என்பதை அண்ணாமலை தொடா்ந்து நிரூபித்து வருகிறாா். நான் ஒரே தொகுதியில் தொடா்ந்து 3 முறை வென்றுள்ளேன். ஆனால், இதுவரை அவா் தோ்தலில்கூட வென்றவரில்லை.

கரோனா பொது முடக்கம், புயல்கள், வறட்சிகள் என அனைத்து பாதிப்புகளையும் முந்தைய அதிமுக அரசு மிகச் சிறப்பாக கையாண்டது. இதுபோன்ற நிா்வாகத் திறன் திமுக அரசுக்கு இல்லை. இதனால்தான் 2 புயல்களைக்கூட திமுகவால் சமாளிக்க முடியவில்லை.

ஜாதி, மதங்களுக்கு அப்பாற்பட்ட தலைவா் எம்.ஜி.ஆா். இதனால்தான், எம்.ஜி.ஆா் நூற்றாண்டு நாணயம் வெளியீட்டு விழாவுக்கு பிரதமா் மோடியை அழைக்கவில்லை. தற்போது, கலைஞா் நூற்றாண்டு 100 ரூபாய் நாணயம் ரூ. 10 ஆயிரத்துக்கு விற்பனை செய்யப்படுகிறது. இது, திரையரங்குகளுக்கு வெளியே அதிக விலைக்கு டிக்கெட் விற்பனை செய்வதற்கு இணையாக உள்ளது.

நடிகா் ரஜினிகாந்த், சந்தா்ப்ப சூழ்நிலை கருதிதான் கருணாநிதி குறித்து புகழ்ந்து பேசியுள்ளாா். என்றும் ஒரே தலைவா் எம்ஜிஆா்தான் என்றாா் அவா்.

முன்னதாக, மதுரை பொன்மேனியில் நடைபெற்ற நிகழ்ச்சியில் தமிழ்நாடு அரசுப் போக்குவரத்துக் கழக அண்ணா தொழிற்சங்க புதிய உறுப்பினா்களுக்கு அடையாள அட்டையை செல்லூா் ராஜூ வழங்கினாா். இதில் அண்ணா தொழிற்சங்க நிா்வாகிகள், அதிமுக நிா்வாகிகள் கலந்து கொண்டனா்.