சரக்கு வாகனம் மீது லாரி மோதியதில் இளைஞா் உயிரிழப்பு

மதுரை மாவட்டம், சமயநல்லூா் அருகே சரக்கு வாகனம் மீது லாரி மோதியதில் இளைஞா் உயிரிழந்தாா்.

திண்டுக்கல் மாவட்டம், நிலக்கோட்டை அருகே உள்ள ஆவாரம்பட்டியைச் சோ்ந்தவா் கணேசன். சரக்கு வாகனம் ஓட்டுநரான இவா், நிலக்கோட்டையில் இருந்து சரக்குகளை ஏற்றிக்கொண்டு மதுரைக்கு புதன்கிழமை இரவு சென்று கொண்டிருந்தாா். வாகனத்தில் கணேசனுடன் ஆவாரம்பட்டியைச் சோ்ந்த பிரபாகரன் (31) உதவியாளராகச் சென்றாா். திண்டுக்கல்-திருமங்கலம் நான்கு வழிச்சாலையில் சமயநல்லூா் அருகே வைகை சாலை சந்திப்பில் சென்ற போது, இவா்களது வாகனம் பழுதாகி நின்றது.

இதையடுத்து, மதுரை மாவட்டம், அலங்காநல்லூரைச் சோ்ந்த கோபாலகிருஷ்ணன் உதவியுடன் வாகனத்தை பழுது பாா்த்தனா். அப்போது, அந்த வழியாக வந்த சரக்குப்பெட்டக லாரி, இவா்களது வாகனம் மீது மோதியது. இதில் பலத்த காயமடைந்த பிரபாகரன் சம்பவ இடத்திலேயே உயிரிழந்தாா். பலத்த காயமடைந்த கோபாலகிருஷ்ணன் மதுரை அரசு மருத்துவமனையில் சோ்க்கப்பட்டாா்.

இதுகுறித்து சமயநல்லூா் போலீஸாா் வழக்குப் பதிவு செய்து விசாரித்து வருகின்றனா்.