வேடசந்தூர் அருகே மதுக்கடையை எதிர்த்து சாலை மறியல்

வேடசந்தூர் அருகே மதுக்கடைக்கு எதிர்ப்பு தெரிவித்து கிராம மக்கள் புதன்கிழமை சாலை மறியலில் ஈடுபட்டனர்.
 வேடசந்தூர்- கரூர் சாலையில் உள்ள கருக்காம்பட்டி பகுதியில் புதிய மதுக் கடை திறக்க டாஸ்மாக் அதிகாரிகள் நடவடிக்கை மேற்கொண்டனர். அதன்படி கடையை திறப்பதற்காக புதன்கிழமை அவர்கள் சென்றனர்.
அப்போது அதற்கு எதிர்ப்பு தெரிவித்த அப்பகுதி பொதுமக்கள், வேடசந்தூர்- கரூர் சாலையில் மறியல் போராட்டத்தில் ஈடுபட்டனர்.
 இதுகுறித்து தகவலறிந்த வேடசந்தூர் போலீஸார், அங்கு சென்று போராட்டத்தில் ஈடுபட்டவர்களுடன் பேச்சுவார்த்தை நடத்தினர். மாவட்ட நிர்வாகம் மூலம் மதுக்கடையை அகற்ற நடவடிக்கை எடுக்கப்படும் என உறுதி அளிக்கப்பட்டதை அடுத்து அனைவரும் கலைந்து சென்றனர்.