Enable Javscript for better performance
சமூக வலைதள தகவல்களின் உண்மைத் தன்மையில் கவனம் தேவை: மனோன்மணீயம் சுந்தரனார் பல்கலை. துணைவேந்தர்- Dinamani

சுடச்சுட

    

    சமூக வலைதள தகவல்களின் உண்மைத் தன்மையில் கவனம் தேவை: மனோன்மணீயம் சுந்தரனார் பல்கலை. துணைவேந்தர்

    By DIN  |   Published on : 24th March 2018 12:55 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சமூக வலைதளங்களில் வலம் வரும் தகவல்கள் குறித்த உண்மைத்தன்மையை அறிந்து நாம் கவனத்துடன் செயல்பட வேண்டும் என திருநெல்வேலி மனோன்மணீயம் சுந்தரனார் பல்கலைக்கழகத் துணைவேந்தர் கே.பாஸ்கரன் தெரிவித்தார்.
    திண்டுக்கல் காந்திகிராம கிராமிய நிகர்நிலைப் பல்கலைக்கழகக் கணினி அறிவியல் மற்றும் பயன்பாட்டியல் துறை சார்பில், மேம்பட்ட கணினி நோக்கியல், இணைய வலையமைப்பு மற்றும் தகவலியல் எனும் தலைப்பில் பன்னாட்டுக் கணினி மாநாடு வியாழக்கிழமை தொடங்கியது.
    தொடக்க விழாவுக்கு காந்திகிராமப் பல்கலை. துணைவேந்தர் சு.நடராஜன் தலைமை வகித்தார். திருநெல்வேலி மனோன்மணீயம் சுந்தரனார் பல்கலைக்கழகத் துணைவேந்தர் கே.பாஸ்கரன் மாநாட்டினை தொடங்கி வைத்து, பேசியதாவது:
    தகவல் தொழில்நுட்ப வளர்ச்சிக்கு இணைய வலைப்பின்னல் மிக அவசியமான ஒன்றாக உள்ளது. உலகம் முழுவதும் ஒரே நேரத்திலும், உடனுக்குடனும் தகவல் பரிமாற்றங்கள் நடைபெறுகின்றன. குறிப்பாக சமூக வலைதளங்களில் ஏராளமான தகவல்கள் பகிரப்படுகின்றன.
    அவற்றின் உண்மைத் தன்மையைக் கண்டறிந்து செயல்படுவதில் நாம் மிகுந்த கவனமாக இருக்க வேண்டும். கைவிரல் ரேகை, கருவிழி வழி மூலமாகவும், குற்றவாளிகளைக் கண்டறிவதில் கணினியின் பயன்பாடு குறிப்பிடத்தக்கது. கணினித் துறையில் உலகளவில் வரவேற்பை பெறுவதில் இந்திய மாணவர்கள் முன்னிலையில் உள்ளனர். நாட்டின் சமூக, பொருளாதார, கல்வி, ஆராய்ச்சி வளர்ச்சிக்கு கணினித் துறையின் செயல்பாடு முக்கிய பங்காற்றி வருகிறது என்றார்.
    முன்னதாக மாநாட்டு கட்டுரை நூலினை வெளியிட்டு துணைவேந்தர் சு.நடராஜன் பேசியதாவது:
    கணினி சார்ந்த கண்டுபிடிப்புகளும், அவற்றின் பயன்பாடுகளும் அனைத்து துறைகளிலும் தாக்கத்தை ஏற்படுத்தியுள்ளன. துல்லியமான கணிப்புகளுக்கும் நுட்பமான செயல்பாடுகளுக்கும் பல்துறை ஆய்வுகளுக்கும், கணினி மென்பொருள்களின் பயன்பாடு முக்கியத் தேவையாக இருந்து வருகிறது.
    மேலும், இயற்கை பேரிடர் காலங்களிலும், மருத்துவம், நிலவியல், மண்ணியல், பருவநிலை மாற்றங்கள், வானிலை, விவசாயப் பொருள்களின் உற்பத்திக்கான நவீன வழிமுறைகளைக் கண்டறியவும் கணினியின் உதவி முக்கியத் தேவையாக இருந்து வருகிறது. மக்களின் தேவைக்கு ஏற்ப, கணினி ஆய்வுகள் காலத்திற்கேற்ப மேலும் வளர்த்தெடுக்கப்பட வேண்டும். அதற்கு இந்தப் பன்னாட்டு மாநாடு உதவும் என்றார்.
    இந்நிகழ்ச்சியில் கணினி அறிவியல் மற்றும் பயன்பாட்டியல் துறைத் தலைவர் பி.கலாவதி, உதவி பேராசிரியை டி.கலைச்செல்வி, ஒருங்கிணைப்பாளர் கே.சோமசுந்தரம், மலேயா பல்கலை. பேராசிரியர் சிவகுமார பாலையா நகோட்டே உள்ளிட்டோர் கலந்து கொண்டனர்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai