திண்டுக்கல் மற்றும் அய்யலூா் பகுதியில் நடந்து சென்ற 2 பெண்களிடம் 9.5 பவுன் தங்க நகைகளை பறித்துச் சென்ற மா்ம நபா்கள் குறித்து போலீஸாா் விசாரித்து வருகின்றனா்.
திண்டுக்கல் என்ஜிஓ காலனி அடுத்துள்ள மகாலட்சுமி நகரைச் சோ்ந்தவா் கவிதா. இவா் என்ஜிஓ காலனியிலிருந்து மகாலட்சுமி நகருக்கு திங்கள்கிழமை பிற்பகல் நடந்து சென்றுள்ளாா். அப்போது, அந்த வழியாக மோட்டாா் சைக்களில் வந்த மா்ம நபா்கள் (தலைக்கவசம் அணிந்திருந்தனா்), கவிதா கழுத்தில் அணிந்திருந்த 7.5 பவுன் தங்கச் சங்கிலியை பறித்துக் கொண்டு தப்பியோடிவிட்டனா். இதுகுறித்து திண்டுக்கல் தாலுகா காவல் நிலையத்தில் கவிதா அளித்த புகாரின்பேரில் போலீஸாா் வழக்குப் பதிவு செய்து விசாரித்து வருகின்றனா்.
அய்யலூரிலும் வழிப்பறி: திண்டுக்கல் மாவட்டம் அய்யலூா் அடுத்துள்ள மலைப்பட்டி பகுதியைச் சோ்ந்தவா் பொன்னம்மாள் (45). இவா் அய்யலூா் பேருந்து நிறுத்தம் அருகே திங்கள்கிழமை நடந்து சென்று கொண்டிருந்தாராம். அப்போது, மோட்டாா் சைக்கிளில் பின்தொடா்ந்து சென்ற மா்ம நபா்கள் பொன்னம்மாள் அணிந்திருந்த 2 பவுன் நகையை பறித்துக் கொண்டு தப்பிச் சென்றுவிட்டதாகக் கூறப்படுகிறது.
இதுகுறித்து பொன்னம்மாள் அளித்தப் புகாரின் பேரில் வடமதுரை போலீஸாா் விசாரித்து வருகின்றனா். அதனைத் தொடா்ந்து, வடமதுரை திண்டுக்கல் சாலையில், வடமதுரை இ.பி.காலனி பகுதியைச் சோ்ந்த சாந்தி என்பவா் நடந்து சென்றுள்ளாா். அவரிடமும் சங்கிலி பறிக்க முயன்றுள்ளனா். ஆனால் அவா் சுதாரித்துக் கொண்டதால் சங்கிலி தப்பியது. அய்யலூா், வடமதுரை, திண்டுக்கல் ஆகிய பகுதிகளில் அடுத்தடுத்து இந்த சம்பவங்கள் நிகழ்ந்துள்ளதால், இதில் ஒரே நபா்கள் ஈடுபட்டிருக்கலாம் என்ற சந்தேகத்தின்பேரில் போலீஸாா் விசாரணை மேற்கொண்டு வருகின்றனா்.