சேலம் மாவட்டத்திலுள்ள ஊராட்சி ஒன்றிய அலுவலகத்தில் காணாமல் போன 5 காசோலைகள் குறித்து, வேடசந்தூா் ஒன்றியத்திலுள்ள ஊராட்சி செயலரிடம் போலீஸாா் வியாழக்கிழமை விசாரணை மேற்கொண்டனா்.
சேலம் மாவட்டம், வீரபாண்டி ஊராட்சி ஒன்றிய அலுவலகத்தில் 5 காசோலைகள் காணாமல் போனதாக கடந்த சில நாள்களுக்கு முன்பு தகவல் வெளியானது. இதுகுறித்து வீரபாண்டி வட்டார வளா்ச்சி அலுவலா் சாா்பில் வீரபாண்டி காவல் நிலையத்தில் புகாா் அளிக்கப்பட்டுள்ளது. இந்நிலையில், காணாமல் போன காசோலைகளை பயன்படுத்தி திருவாரூா் மாவட்டத்தில் பணப் பரிமாற்றம் செய்தபோது 3 பேரை போலீஸாா் கைது செய்துள்ளனா்.
அவா்களிடம் நடத்திய விசாரணையில், திண்டுக்கல் மாவட்டம் வேடசந்தூா் ஒன்றியத்தைச் சோ்ந்த ஊராட்சி செயலா் ஒருவருக்கும் அதில் தொடா்புள்ளதாக தெரியவந்துள்ளது. மேலும், திண்டுக்கல் மாவட்டத்தைச் சோ்ந்த அந்த ஊராட்சி செயலரே காசோலையில் கையொப்பமிட்டு கொடுத்துள்ளதாக வீரபாண்டி வட்டார வளா்ச்சி அலுவலா் போலீஸாரிடம் தெரிவித்துள்ளாா். அதன்பேரில், சேலம் மற்றும் திருவாரூா் மாவட்ட போலீஸாா் திண்டுக்கல் மாவட்டம் வேடசந்தூா் ஊராட்சிக்குள்பட்ட குடப்பம் ஊராட்சி செயலா் மணிவேல் என்பவரிடம் வியாழக்கிழமை விசாரணை மேற்கொண்டனா். அப்போது, காசோலை மோசடிக்கும் தனக்கும் எவ்வித தொடா்புமில்லை என மணிவேல், போலீஸாரிடம் தெரிவித்ததாக வேடசந்தூா் வட்டார வளா்ச்சித் துறை அலுவலா்கள் தெரிவித்தனா். இப் பிரச்னை வேடசந்தூா் ஊராட்சி ஒன்றிய அலுவலா்கள் மத்தியில் பரபரப்பை ஏற்படுத்தியுள்ளது.