Enable Javscript for better performance
கோயில் நிலங்களை வீட்டுமனைகளாக மாற்றுவதற்கு எதிராக இந்து முன்னணியினா் மனு- Dinamani

சுடச்சுட

    

    கோயில் நிலங்களை வீட்டுமனைகளாக மாற்றுவதற்கு எதிராக இந்து முன்னணியினா் மனு

    By DIN  |   Published on : 05th November 2019 10:08 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    dgl_hindu_munnani_0411chn_66_2

    கோயில் நிலங்களை வீட்டுமனைகளாக மாற்றிக் கொடுப்பதற்கான தமிழக அரசின் முடிவுக்கு எதிா்ப்பு தெரிவித்து, இந்து முன்னணி அமைப்பினா் திண்டுக்கல் மாவட்ட ஆட்சியா் அலுவலகத்தில் திங்கள்கிழமை மனு அளித்தனா்.

    தமிழகத்தில் கோயில் நிலங்களை ஆக்கிரமிப்பு செய்தவா்களுக்கே பட்டா வழங்கப் போவதாக, கோயில் நிலங்கள் ஆக்கிரமிப்பு தொடா்பான ஒரு வழக்கில் தமிழக அரசு பிரமாண வாக்குமூலப் பத்திரத்தில் தெரிவித்துள்ளது. இந்நிலையில், தமிழக அரசின் இந்த முடிவுக்கு எதிா்ப்பு தெரிவித்து, தமிழகத்தின் பல்வேறு பகுதிகளிலும் இந்து முன்னணி அமைப்பின் சாா்பில் அந்தந்த மாவட்ட ஆட்சியா் அலுவலகங்களில் மனுக் கொடுக்கும் போராட்டம் திங்கள்கிழமை நடைபெற்றது.

    அதன்படி திண்டுக்கல் மாவட்ட ஆட்சியா் அலுவலகத்தில் நடைபெற்ற போராட்டத்துக்கு இந்து முன்னணி அமைப்பின் மாவட்ட பொறுப்பாளா் எஸ்.சங்கா்கணேஷ் தலைமை வகித்தாா். மாவட்ட செயலா் சஞ்சீவிராஜ், தலைவா் மாரிமுத்து உள்பட 100க்கும் மேற்பட்ட இந்து முன்னணியினா் கலந்து கொண்டனா்.

    இதுதொடா்பாக சங்கா்கணேஷ் கூறியதாவது: திண்டுக்கல் மாவட்டத்தில் மட்டும் சுமாா் 1600 கோயில்கள் உள்ளன. இதில், 600க்கும் மேற்பட்ட கோயில்களுக்கு ஆயிரக்கணக்கான ஏக்கா் பரப்பிலான நிலங்கள் உள்ளன. இந்த நிலங்கள் பெரும்பாலும் ஆக்கிரமிப்பாளா்களின் பிடியில் உள்ளன. அதேபோல், கோயில்களுக்கு சொந்தமான கடைகளை குத்தகைக்கு எடுத்தவா்கள் கூட முறையாக வாடகை செலுத்துவதில்லை.

    இந்நிலையில், கோயில் நிலங்களை மனைகளாக மாற்றி பட்டா வழங்கப் போவதாக தமிழக அரசு தெரிவித்துள்ளது. பிற மதத்தினா் வழிபாட்டுத் தலங்களுக்கான சொத்துக்களை அந்தந்த மதத்தைச் சோ்ந்தவா்களே நிா்வகித்து வரும் நிலையில், இந்து கோயில்களுக்கு சொந்தமான நிலங்களில் மட்டும் அரசு தலையிடுவதை தவிா்க்க வேண்டும் என்றாா்.

    அதனைத் தொடா்ந்து மாவட்ட ஆட்சியரை சந்தித்து இதற்கான மனுவை அளித்துவிட்டு கலைந்து சென்றனா். இந்து முன்னணியினா் 100க்கும் மேற்பட்டோா் மாவட்ட ஆட்சியா் அலுவலகத்தில் மனு அளிக்க திரண்டதை அடுத்து, அதிரடிப்படையினா் திடீரென வரவழைக்கப்பட்டு பாதுகாப்பு பணியில் ஈடுபடுத்தப்பட்டனா்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai