பழனி: பழனி அருகேயுள்ள கே.வேலூரில் 18 ஆம் நூற்றாண்டைச் சோ்ந்த அருணாச்சலப் புராணத்தின் பிரதி தொகுதி அடங்கிய ஓலைச்சுவடி கண்டெடுக்கப்பட்டுள்ளது.
தொல்லியல் ஆய்வாளா் நாராயணமூா்த்தி மற்றும் கணியா் ஞானசேகரன் ஆகியோா் ஓலைச்சுவடி தொடா்பாக ஆய்வு மேற்கொண்டனா். இது குறித்து தொல்லியல் ஆய்வாளா் நாராயணமூா்த்தி கூறியதாவது:
ஞானசேகரன் வீட்டில் அவரது மூதாதையருக்குச் சொந்தமான இந்த ஓலைச்சுவடி பரண் மேல் தகரப் பெட்டிக்குள் இருந்தது. இதனை ஆராய்ந்தபோது, இது அருணாசலப் புராணத்தின் ஒரு பிரதி என்பது தெரியவந்தது.
அருணாசலப் புராணம் கி.பி, 16 ஆம் நூற்றாண்டில் சைவ எல்லப்ப நாவலரால் இயற்றப்பட்டது. அந்த புராணத்தின் மூலமும், உரையும் கொண்ட ஓலைச்சுவடி பிரதிதான் தற்போது கிடைத்துள்ளது. ஓலைச்சுவடியின் முதல் ஓலையில் பாலதண்டாயுதபாணி லட்சிப்பாா் என்ற ஒற்றை வரி காணப்படுகிறது. அடுத்த ஓலையில், ஒரு வரலாற்றுச் செய்தி காணப்படுகிறது.
ஆனந்த வருடம் புரட்டாசி மாதம் 4 திங்கள், 5 செவ்வாய்க்கிழமைகளில் சாயந்திரம் கிளாரெட் துரையும், பெங்களூா் துரையும் வந்து நாயக்கரின் வழக்கு பிரச்னையை தீா்த்துவைத்து, ஒரு உடன்படிக்கை ஏற்படுத்தப்பட்டு ராசியானதாக எழுதப்பட்டுள்ளது. இவா்கள் யாா் என்ற செய்தியும், என்ன வழக்கு?, என்ன பிரச்னை? என்பதை ஓலையில் குறிப்பிடவில்லை.
இந்த உடன்படிக்கையின் நினைவாக, கலையம்புத்தூரைச் சோ்ந்த மாரிமுத்து பண்டாரத்தின் மகன் சிதம்பர பண்டாரம் என்பவா் அருணாசலப் புராணத்தை தனக்கு வேண்டுமென எழுதியதாகக் குறிப்பிடுகிறாா். அடுத்த ஓலையில் அருணாசலப் புராணத்தின் பாயிரச் சிறப்பு 21 பாடல்களில் எழுதப்பட்டுள்ளது. உடன்படிக்கை ஏற்பட்ட 6 நாள்களில் விஜயதசமி, ஆயுத பூஜையில் புராணத்தை எழுதி முடித்ததாகக் கூறுகிறாா்.
பின்னா், ஒவ்வொரு சருக்கமாக எழுதத் துவங்குகிறாா். ஒவ்வொரு சருக்கத்தின் முடிவிலும் தன் பெயரை எழுதி, சருக்கம் முடிவு பெற்ற நாளையும், சருக்கத்தை எழுதி முடிக்க யாா் உதவியும், வசதியும் செய்து கொடுத்தாா்கள் என்பதையும் குறிப்பிடுகிறாா். மூலப்புராணம் 649 பாடல்களில் 15 சருக்கங்களாக எழுதப்பட்ட நிலையில், படி எடுத்த சிதம்பர பண்டாரம் புதிது புதிதாக பாடல் எடுத்து விரிவுபடுத்தினாரா எனத் தெரியவில்லை.
நள ஆண்டு ஐப்பசி மாதம் 18 ஆம் தேதி சனிக்கிழமை 1797 ஆம் ஆண்டு இது எழுதி முடிக்கப்பட்டுள்ளது. மூன்று ஆண்டுகளுக்கும் மேலாக இந்த புராணம் எழுதப்பட்டதாகத் தெரிகிறது.
கம்பராமாயணம் எழுதும்போது, சடையப்ப வள்ளல் அவரை ஆதரித்து நூல் எழுத உதவி செய்ததை நாம் அறிவோம். அதுபோல், முற்காலத்தில் நூல் எழுதுவோருக்கும், அதை படி எடுப்போருக்கும் தமிழக மக்கள் வசதியும், உதவியும் செய்து கொடுத்திருக்கிறாா்கள் என்பதை இந்த ஓலைச்சுவடியின் மூலம் அறிய முடிகிறது எனத் தெரிவித்தாா்.