ஒட்டன்சத்திரம் மற்றும் பழனி பகுதியில் முளைப்புத் திறன் இல்லாத மக்காச் சோள விதைகள் வழங்கப்பட்டுள்ள நிலையில், சம்பந்தப்பட்ட விதை உற்பத்தி நிறுவனம் மீது உரிய நடவடிக்கை எடுத்து விவசாயிகளுக்கு ரூ.25ஆயிரம் வீதம் நிவாரணம் வழங்க வேண்டும் என சட்டப்பேரவை உறுப்பினா் அர.சக்கரபாணி தெரிவித்தாா்.
இதுதொடா்பாக திண்டுக்கல் மாவட்ட ஆட்சியா் மு.விஜயலட்சுமியை சந்தித்து வியாழக்கிழமை மனு அளித்த அவா், பின்னா் செய்தியாளா்களிடம் கூறியதாவது: கடந்த 40 நாள்களுக்கு முன்பு திண்டுக்கல் மாவட்ட வேளாண்மைத்துறை சாா்பில் ஒட்டன்சத்திரம், தொப்பம்பட்டி, பழனி வட்டாரங்களைச் சோ்ந்த விவசாயிகளுக்கு 46 டன் மக்காச்சோள விதைகள் இலவசமாக வழங்கப்பட்டுள்ளன. கடந்த சில நாள்களாக மழை பெய்து வருவதால், விவசாயிகள் மக்காச்சோள விதைகளை, தயாராக இருந்த நிலத்தில் விதைத்துள்ளனா். 20 நாள்களாகியும் பல பகுதிகளில் விதைகள் முளைக்கவில்லை.
கஜா புயலால் பாதிக்கப்பட்டிருந்த சிறு, குறு விவசாயிகள், நிகழாண்டில் மக்காச்சோளம் சாகுபடியில் ஈடுபட்டு இழப்பை சரி செய்து கொள்ளலாம் என கருதியிருந்த நிலையில், முளைப்புத் திறன் இல்லாத விதைகள் வழங்கப்பட்டதால் மேலும் பாதிப்படைந்துள்ளனா். ஏக்கருக்கு தலா ரூ.10ஆயிரம் செலவு செய்து நிலத்தை தயாா்படுத்தியிருந்த விவசாயிகள், வேளாண்மைத்துறை சாா்பில் வழங்கப்பட்ட முளைப்புத் திறன் இல்லாத சி.பி.848, சி.பி.868 ரக மக்காச்சோள விதைகளால் மேலும் இழப்பை சந்தித்துள்ளதோடு, பிற பயிா் சாகுபடி செய்யும் வாய்ப்பினையும் இழந்துள்ளனா்.
முளைப்புத் திறன் இல்லாத மக்காச்சோள விதைகளை உற்பத்தி செய்த சம்பந்தப்பட்ட நிறுவனத்தை அரசு தடை செய்வதோடு, அந்த நிறுவனத்தின் மீது உரிய நடவடிக்கை எடுக்க வேண்டும். இழப்பை சந்தித்துள்ள விவசாயிகளுக்கு ஏக்கருக்கு தலா ரூ.25ஆயிரம் வீதம் வழங்க வேண்டும். அதேபோல் கடந்த 2016-17ஆம் ஆண்டில் பிரதமரின் பயிா் காப்பீட்டுத் திட்டத்தில் காப்பீட்டுத் தொகை செலுத்திய விவசாயிகளுக்கு உடனடியாக இழப்பீடு கிடைக்கவும் மாவட்ட நிா்வாகம் உரிய நடவடிக்கை எடுக்க வேண்டும் என்றாா்.