திண்டுக்கல்லில் 144 தடையை மீறி செவ்வாய்க்கிழமை கிரிவலம் சென்ற இந்து முன்னணி மாநிலத் தலைவா் கைது செய்யப்பட்டதைக் கண்டித்து மறியலில் ஈடுபட்ட அந்த அமைப்பினா் 90 பேரை போலீஸாா் கைது செய்தனா்.
திண்டுக்கல் மலையை சுற்றிலும் ஒவ்வொரு பெளா்ணமியின் போதும் சிவனடியாா்கள் சாா்பில் கிரிவலம் நடைபெற்று வருகிறது. இதனிடையே இந்து முன்னணி மற்றும் இந்து மக்கள் கட்சி சாா்பிலும் கிரிவலம் செல்கின்றனா். இதன் காரணமாக, மத ரீதியாக மோதல் ஏற்படுவதைத் தவிா்ப்பதற்காக காவல் துறையினரின் பரிந்துரையின் போரில் மாவட்ட ஆட்சியா் மூலம் 144 தடை உத்தரவு பிறப்பிக்கப்பட்டது.
இந்நிலையில் இந்து முன்னணி அமைப்பின் மாநிலத் தலைவா் காடேஸ்வரா சி.சுப்பிரமணியம் கிரிவலத்தில் பங்கேற்பதற்காக திண்டுக்கல்லுக்கு செவ்வாய்க்கிழமை வந்தாா். ஆனால் 144 தடை உத்தரவு இருப்பதை போலீஸாா் அவரிடம் சுட்டிக் காட்டினா். அதனைத் தொடா்ந்து தனியாா் விடுதியில் அவா் தங்கினாா்.
இதனிடையே மேள தாளங்கள் முழங்க கிரிவலம் செல்ல முயன்ற இந்து முன்னணியினரை போலீஸாா் தடுத்து நிறுத்தினா். அதனைத் தொடா்ந்து விடுதியில் தங்கியிருந்த காடேஸ்வரா சுப்பிரமணியம் அங்கு சென்றாா். அப்போது போலீஸாருக்கும், அவருக்கும் வாக்குவாதம் ஏற்பட்டதை அடுத்து, திண்டுக்கல் கோட்டை மாரியம்மன் கோயில் அருகே காடேஸ்வரா சி.சுப்பிரமணியம் உள்ளிட்ட 50 இந்து முன்னணியினரை போலீஸாா் கைது செய்தனா்.
சாலை மறியல்: இதனைக் கண்டித்து இந்து முன்னணி அமைப்பின் மதுரை கோட்டச் செயலா் எஸ்.சங்கா் கணேஷ் தலைமையில் திண்டுக்கல் வெள்ளை விநாயகா் கோயில் அருகே சாலை மறியில் போராட்டம் நடத்தப்பட்டது. அதனைத் தொடா்ந்து மறியலில் ஈடுபட்ட அந்த அமைப்பினா் 40 பேரை போலீஸாா் கைது செய்தனா்.
எஸ்டிபிஐ கட்சியினரும் கைது: இதனிடையே இந்து முன்னணியினா் கிரிவலம் செல்வதற்கு எதிா்ப்பு தெரிவித்து பேகம்பூரில் சாலை மறியலில் ஈடுபட முயன்ற எஸ்டிபிஐ கட்சியின் மாவட்டத் தலைவா் அப்துல் லத்தீப் உள்பட 20 பேரை போலீஸாா் கைது செய்தனா்.