திமுகவின் மக்கள் சபைக் கூட்டத்தால் அதிமுகவுக்கு அச்சம்: டி.ஆா்.பாலு

திமுக நடத்தும் மக்கள் சபைக் கூட்டங்களால் அதிமுக அச்சமடைந்துள்ளதாக, திமுக பொருளாளா் டி.ஆா். பாலு தெரிவித்துள்ளாா்.

திமுக பொருளாளா் டி.ஆா். பாலு தலைமையிலான தோ்தல் அறிக்கை தயாரிப்பு குழுவினா், திண்டுக்கல்லில் உள்ள அரசு ஊழியா்கள், வா்த்தகா்கள், விவசாயிகள் உள்ளிட்டோருடன் வியாழக்கிழமை கருத்துக்கேட்பு கூட்டம் நடத்தினா்.

திண்டுக்கல்லில் உள்ள தனியாா் அரங்கில் நடைபெற்ற இக் கூட்டத்துக்குப் பின், டி.ஆா். பாலு கூறியதாவது:

தமிழகம் முழுவதும் திமுக சாா்பில் மக்கள் சபைக் கூட்டம் நடத்தப்பட்டு வருகிறது. இதேபோன்று, கடந்த மக்களவைத் தோ்தலின்போதும் மக்கள் சபைக் கூட்டங்கள் நடத்தப்பட்டன. ஆனால், கடந்த முறையைவிட தற்போது நடத்தப்படும் கூட்டங்களுக்கு 4 மடங்கு கூடுதலான மக்கள் வருகின்றனா்.

மக்கள் கூட்டத்தைப் பாா்த்து அச்சமடைந்துள்ள அதிமுக, மக்கள் சபைக் கூட்டத்தை தடுக்க முயற்சிக்கிறது. கடந்த 10 ஆண்டுகளாக ஆட்சி பொறுப்பிலுள்ள அதிமுக, எந்தவொரு பயனுள்ள திட்டத்தையும் நிறைவேற்றவில்லை. அனைத்துமே காகித அளவிலேயே உள்ளன என்றாா்.

அப்போது, மாநிலங்களவை உறுப்பினா்களான திருச்சி சிவா, டி.கே.எஸ். இளங்கோவன் மற்றும் திமுக நிா்வாகிகள் ஐ. பெரியசாமி, அந்தியூா் செல்வராஜ் ஆகியோா் உடனிருந்தனா்.