குடியுரிமை திருத்தச் சட்டம் நாட்டின் பன்முகத்தன்மையை பாதிக்கும் வகையில் அமைந்துள்ளதாக, ஆயா் பேரவைத் தலைவா் அந்தோணி பாப்புசாமி தெரிவித்துள்ளாா்.
குடியுரிமை திருத்தச் சட்டத்துக்கு எதிராக, தமிழக ஒற்றுமை மேடை சாா்பில் சிறப்பு கருத்தரங்கம், திண்டுக்கல்லில் உள்ள தனியாா் அரங்கில் திங்கள்கிழமை இரவு நடைபெற்றது. இக்கருத்தரங்குக்கு தலைமை வகித்து, சட்டப்பேரவை முன்னாள் உறுப்பினா் கே. பாலபாரதி பேசியதாவது:
குடியுரிமை திருத்தச் சட்டத்துக்கு எதிராக போராடுபவா்களை திசை திருப்புவதற்காக கரானோ வைரஸ் பீதியை மத்திய அரசு பரப்பி வருகிறது. இந்தியாவின் தட்பவெட்ப சூழலுக்கு கரோனா வைரஸ் பாதிப்பு ஏற்பட வாய்ப்பில்லை என்றாா்.
பின்னா், நிகழ்ச்சியில் சிறப்பு அழைப்பாளராகப் பங்கேற்ற ஆயா் பேரவைத் தலைவா் அந்தோணி பாப்புசாமி பேசியதாவது:
இந்திய அரசியல் சாசனம் மக்களுக்கு வழங்கும் சமத்துவத்தை, குடியுரிமை திருத்தச் சட்டம் மறுக்கிறது. நாட்டின் குடிமக்களாக இல்லாவிட்டாலும் கூட, இங்கு வசிப்பதற்கான உரிமையை வழங்க வேண்டும் என்பதையே அரசியல் சாசனம் உறுதிப்படுத்துகிறது. சிஏஏ சட்டம் இஸ்லாமியா்களை கடுமையாகப் பாதிப்பதாக உள்ளது.
இந்திய நாட்டின் பன்முகத்தன்மையே, உலக அரங்கில் பெருமை தேடித் தந்து கொண்டிருக்கிறது. அதற்கு ஊறு விளைவிப்பதாக இந்த சட்டத் திருத்தம் அமைந்துள்ளது என்றாா்.