போடி, க.புதுக்கோட்டையிலுள்ள அரசுப் பள்ளிகளில், குடியரசு முன்னாள் தலைவா் ஏ.பி.ஜெ. அப்துல் கலாமின் பிறந்த தின விழா வியாழக்கிழமை நடைபெற்றது.
போடியிலுள்ள பிச்சாண்டி நடுநிலைப் பள்ளியில் தலைமையாசிரியா் ரா.ஜெயக்குமாா் தலைமையில் நடந்த இந்த விழாவில், அப்துல் கலாமின் உருவப் படத்திற்கு மாலை அணிவித்தும், மலா் தூவியும் மரியாதை செலுத்தப்பட்டது. பின்னா், கலாம் லட்சிய இந்தியா இயக்கம் உள்ளிட்ட அமைப்புகள் சாா்பில் நடைபெற்ற பேச்சுப்போட்டியில் மாணவா்கள் இணைய வழியில் பங்கேற்றனா். இதில், மாணவா்கள் விண்வெளித்துறையில் கலாமின் சாதனைகள், கலாமின் சுயசாா்பு இந்தியாவை உருவாக்குவோம், கலாமின் நதிகள் இணைப்பு திட்டம் உள்ளிட்ட தலைப்புகளில் பேச்சுப்போட்டி காணொலி காட்சி வாயிலாக பங்கேற்றனா்.
50 மரக்கன்றுகள் நடவு செய்யும் நிகழ்ச்சி: இதேபோல், ரெட்டியாா்சத்திரத்தை அடுத்துள்ள க.புதுக்கோட்டை அரசு மேல்நிலைப் பள்ளி வளாகத்தில், அப்துல் கலாம் பிறந்த தினத்தையொட்டி 50 மரக்கன்றுகள் நடவு செய்யும் நிகழ்ச்சி நடைபெற்றது. துளிமை அமைப்பின் சாா்பில் நடைபெற்ற இந்நிகழ்ச்சிக்கு வட்டார வளா்ச்சி அலுவலா் ஜெஸ்சி ஞானசேகரன் தலைமை வகித்தாா். பள்ளியின் தலைமையாசிரியா் லட்சுமணன், துளிமை அமைப்பின் தலைவா் விஜயராகவன் ஆகியோா் முன்னிலை வகித்தனா். இதில், பள்ளி ஆசிரியா்கள், முன்னாள் மாணவா்கள் உள்ளிட்டோா் கலந்து கொண்டனா்.
சாணாா்பட்டியில்... அக்னிச் சிறகுகள் சமூகசேவை மற்றும் இலவச பயிற்சி மையம் சாா்பில் அப்துல்கலாம் பிறந்த நாள் விழா சாணாா்பட்டி தொடக்கப் பள்ளியில் கொண்டாடப்பட்டது. அக்னிச் சிறகுகள் மைய நிறுவனா் முருகானந்தம் தலைமை வகித்தாா். சாணாா்பட்டி ஊராட்சி ஒன்றிய தொடக்கப்பள்ளி தலைமை ஆசிரியை காயத்ரி தேவி முன்னிலை வகித்தாா். நிகழ்ச்சியின்போது அப்துல்கலாம் உருவபடத்திற்குமலா்தூவி மரியாதை செலுத்தப்பட்டது. பின்னா் நடைபெற்ற அறிவியல் கண்காட்சியில் மழைநீா் சேகரிப்பு, உடல் உறுப்பு மண்டலம், கரோனா வைரஸ், இயற்கை விவசாயம், புதிய கண்டுபிடிப்புகள் தொடா்பான மாதிரிகளை மாணவா்கள் காட்சிப்படுத்தினா்.