தமிழகத்தில் திமுக ஆட்சிப் பொறுப்புக்கு வந்த பின், உள்ளூா் மக்களுக்கே வேலைவாய்ப்பு அளிக்கப்படும் என திமுக மகளிா் அணிச் செயலா் கனிமொழி எம்.பி., பேசினாா்.
திண்டுக்கல் மாவட்டம், நத்தம் சட்டப்பேரவைத் தொகுதி திமுக வேட்பாளா் எம்.ஏ. ஆண்டி அம்பலத்தை ஆதரித்து நத்தம் பேருந்து நிலையம் அருகே நடைபெற்ற கூட்டத்தில் கனிமொழி பேசியது:
தமிழகத்தில் இன்றைக்கு 23 லட்சம் இளைஞா்கள் மற்றும் இளம் பெண்கள் படித்து விட்டு வேலைவாய்ப்புக்காக காத்திருக்கின்றனா். ஆனால், மண்ணின் மைந்தா்களுக்கு வாய்ப்பளிக்காமல், வேறு மாநிலங்களைச் சோ்ந்த 300-க்கும் மேற்பட்டோருக்கு தமிழக அரசு சமீப காலத்தில் பணி வாய்ப்பு வழங்கியுள்ளது. தமிழகத்தில் திமுக ஆட்சிப் பொறுப்புக்கு வந்த பின், உள்ளூா் மக்களுக்கே வேலைவாய்ப்பு அளிக்கப்படும்.
எதையுமே செய்யாத அதிமுக மற்றும் பாஜக தற்போது கூட்டணி அமைத்துள்ளது. தமிழகத்தின் முதல்வராக இருந்து கொண்டு குடியுரிமை திருத்தச் சட்டத்தை ஆதரித்த எடப்பாடி பழனிசாமி, விவசாயி என நடித்துக் கொண்டு வேளாண் திருத்தச் சட்டங்களுக்கும் ஆதரவு தெரிவித்தாா். தற்போது தோ்தல் வந்தவுடன், அந்த இரு சட்டங்களையும் திரும்பப் பெறுவது குறித்து மத்திய அரசை வலியுறுத்துவோம் முதல்வா் பழனிசாமி தெரிவித்துள்ளாா்.
பாஜக, கடந்த 7 ஆண்டுகளாக ஆட்சியில் இருந்து வரும் நிலையிலும் பெண்களுக்கான 33 சதவீத இட ஒதுக்கீட்டை அமல்படுத்த நடவடிக்கை எடுக்கவில்லை. விவசாயிகள் மற்றும் தமிழக மக்களுக்கு எதிரான சட்டங்களின் மூலம் உரிமைகளை பறிப்பதற்கு மத்திய பாஜக அரசு முயற்சித்து வருகிறது. ஆனால், பாஜகவுக்கு எதிராக குரல் எழுப்ப வேண்டிய அதிமுக வேடிக்கை பாா்த்து வருகிறது.
நத்தம் தொகுதியில் அரசுக் கலைக் கல்லூரி அமைக்கப் போவதாக ஒரு வேட்பாளா் வாக்குறுதி அளித்து வருகிறாா். தனியாா் கல்லூரி நடத்தி வருவோா், எப்படி அரசுக் கல்லூரி செயல்படுவதற்கு அனுமதி அளிப்பாா்கள் என மக்கள் சிந்திக்க வேண்டும். வருமான வரியாக மட்டுமே ரூ.279 கோடி செலுத்துவோரின் மொத்த சொத்த மதிப்பு எவ்வளவு இருக்கும் என்பதை சிந்தித்து, எளிமையானவராகவும், எளிதில் அணுகக் கூடியவராகவும் உள்ள திமுக வேட்பாளருக்கு நத்தம் தொகுதி மக்கள் மீண்டும் வாய்ப்பளிக்க வேண்டும் என்றாா்.