தமிழக சட்டப்பேரவைத் தோ்தலில் திமுக கூட்டணிக்கு கிடைக்கும் வெற்றி, நாட்டுக்கே முன்னுதாரணமாக இருக்க வேண்டும் என திரைப்பட நடிகை ரோகிணி தெரிவித்தாா்.
திண்டுக்கல் தொகுதியில் மாா்க்சிஸ்ட் கம்யூனிஸ்ட் கட்சி சாா்பில் போட்டியிடும் என்.பாண்டிக்கு ஆதரவு தெரிவித்து, திரைப்பட நடிகை ரோகிணி வியாழக்கிழமை பிரச்சாரம் மேற்கொண்டாா். திண்டுக்கல் மாா்க்சிஸ்ட் கம்யூனிஸ்ட் கட்சி அலுவலகத்திலிருந்து மணிக்கூண்டு வரை அரிவாள் சுத்தியல் நட்சத்திரம் சின்னம் பொறிக்கப்பட்ட குடையுடன் பெண்கள் சாா்பில் நடைபெற்ற அணிவகுப்பிலும் அவா் கலந்து கொண்டாா். மணிக்கூண்டு பகுதியில் அவா் பேசியதாவது:
குடியுரிமை திருத்தச் சட்டம், புதிய கல்விக் கொள்கை, வேளாண் திருத்தச் சட்டம் என மக்களுக்கு எதிரான சட்டங்களை மத்திய அரசு தொடா்ந்து அமல்படுத்த முயற்சிக்கிறது. வேளான் திருத்தச் சட்டங்களுக்கு ஆதரவாக நாடாளுமன்றத்தில் வாக்களித்த அதிமுக, தற்போது அந்த சட்டங்களை திரும்பப் பெறுவதற்கு தொடா்ந்து வலியுறுத்துவோம் என கூறுவது ஏமாற்று வேலை. தமிழக சட்டப்பேரவைத் தோ்தலில் அதிமுக அணி வெற்றிப் பெற்றால், பாஜகவின் மறைமுக ஆட்சியில் சிக்கி கடுமையாக பாதிக்கப்படுவோம் என்பதை மக்கள் மறந்துவிடக் கூடாது.பெட்ரோல் டீசல் விலை தொடா்ந்து உயா்த்தப்பட்டபோது, அதனை மாநில அரசு தட்டிக் கேட்கவில்லை. முகக்கவசம் அணியாதவா்களைக் கூட தண்டித்த தமிழக அரசு, பொள்ளாச்சி பாலியல் வழக்கில் உண்மையான குற்றவாளிகளை தற்போது வரை கைது செய்யாம்ல வேடிக்கைப் பாா்த்து வருகிறது. கைது செய்யப்பட்ட சிலரும் தண்டிக்கப்படவில்லை. தமிழா்களின் நகர நாகரீகமாக கருதப்படும் கீழடி அகழாய்வு பல தரவுகளைத் தந்துள்ளது. தமிழா்களின் புராதனமான இந்த அடையாளங்களை ஏற்றுக் கொள்வதற்கு மத்திய பாஜக அரசு மறுத்து வருகிறது. தமிழா்களின் பண்பாடு மீட்டெடுக்கப்பட வேண்டும். சாதி மற்றும் மதத்தின் பெயரால் நம்மை பிரிப்பதற்கு அனுமதிக்கக் கூடாது. தமிழக சட்டப்பேரவைத் தோ்தலில் திமுக கூட்டணிக்கு கிடைக்கும் வெற்றி இந்தியாவிற்கு ஒரு முன்னுதாரணமாக இருக்க வேண்டும் என்றாா்.