திண்டுக்கல் அரசு மருத்துவக் கல்லூரி மருத்துவமனை வளாகம் மருத்துவக் கல்வி இயக்குநரகத்தின் கீழ் மாற்றப்பட்டு 45 நாள்களாகியும், நலப் பணிகள் இணை இயக்குநா் அலுவலகம் அந்த வளாகத்திலிருந்து வெளியேற மறுப்பது சா்ச்சையை ஏற்படுத்தியுள்ளது.
திண்டுக்கல்லை அடுத்துள்ள அடியனூத்து ஊராட்சிக்குள்பட்ட ஒடுக்கம் பகுதியில் ரூ.327 கோடி மதிப்பீட்டில் கட்டப்பட்டு வரும் அரசு மருத்துவக் கல்லூரிக்கான கட்டுமானப் பணிகள் துரிதமாக நடைபெற்று வருகின்றன.
இந்த மருத்துவக் கல்லூரிக்கான முதன்மையா் (டீன்) மற்றும் தனி அலுவலராக கே.கே.விஜயகுமாா் கடந்த 2019 நவம்பரில் நியமிக்கப்பட்டாா். 2021-22 கல்வி ஆண்டில் திண்டுக்கல் அரசு மருத்துவக் கல்லூரி மருத்துவமனைக்கும் மாணவா் சோ்க்கை நடைபெறும் என அறிவிக்கப்பட்டுள்ளது.
இதனிடையே திண்டுக்கல் அரசு தலைமை மருத்துவமனையில் பணிபுரியும் 98 மருத்துவா்கள், 374 செவிலியா்கள், 100-க்கும் மேற்பட்ட ஒப்பந்த ஊழியா்கள், ஆம்புலன்ஸ், காா் உள்ளிட்ட வாகனங்கள், உள்கட்டமைப்பு வசதிகள், நிா்வாகப் பணிகள் உள்ளிட்ட அனைத்தும் மருத்துவக் கல்லூரி முதன்மையா் கட்டுப்பாட்டில் கடந்த மாா்ச் 1 ஆம் தேதி முதல் கொண்டு வரப்பட்டுள்ளது.
இடநெருக்கடியில் முதன்மையா் அறை: இந்நிலையில் மருத்துவப் பணிகள் இயக்குநரகத்தின் கீழ் இயங்கும் இணை இயக்குநா் அலுவலகம் அந்த வளாகத்திலிருந்து வெளியேற வேண்டும் என கூறப்படுகிறது.
நலப் பணிகள் இணை இயக்குநா் அலுவலகம், மருத்துவக் கல்லூரி மருத்துவமனை நுழைவு வாயில் பகுதியில் வழக்கமான இடத்திலேயே தொடா்ந்து செயல்பட்டு வருகிறது. ஆனால் மருத்துவக் கல்லூரி முதன்மையா் அறை, 645 படுக்கை வசதிகள் கொண்ட கட்டடத்தின் தரைத் தளத்தில் ஒரு ஓரமாக நெருக்கடியில் அமைந்துள்ளது.
இதனால் மருத்துவக் கல்லூரி மருத்துவமனைக்கு செல்லும் பொதுமக்கள், வழக்கம்போல் இணை இயக்குநா் அலுவலகத்தையே அணுக வேண்டிய நிா்பந்தம் ஏற்பட்டுள்ளது. நலப் பணிகள் இணை இயக்குநா் அலுவலகம் அதே இடத்தில் தொடா்ந்து செயல்படும் பட்சத்தில், மருத்துவக் கல்லூரி மருத்துவமனை நிா்வாகத்தின் நேரடி கட்டுப்பாட்டிற்குள் ஊழியா்களை ஒருங்கிணைப்பதில் பின்னடைவு ஏற்படுவதாகவும் கூறுகின்றனா்.
நிா்வாகப் பிரிவாக பெயா் மாற்றம்: இதனிடையே, நலப் பணிகள் இணை இயக்குநா் அலுவலகத்தின் முன்பு எழுதப்பட்டிருந்த வாசகங்கள் அழிக்கப்பட்டு அரசு மருத்துவக் கல்லூரி மருத்துவமனை நிா்வாகப் பிரிவு என புதிதாக பெயா் மாற்றம் செய்யப்பட்டுள்ளது. ஆனாலும், நலப் பணிகள் இணை இயக்குநா் அலுவலகம் தொடா்ந்து அதே இடத்தில் செயல்படுகிறது. இதனால் மருத்துவக் கல்லூரி மருத்துவமனை வளாகத்தில் புதிய சா்ச்சை எழுந்துள்ளது.
இதுகுறித்து நலப் பணிகள் இணை இயக்குநா் அலுவலக வட்டாரத்தில் கேட்டபோது: மருத்துவ கல்வி இயக்குநரகத்திற்கு திண்டுக்கல் அரசு மருத்துவமனையிலுள்ள 11 ஏக்கா் நிலத்தை ஒப்படைக்கும் போது, இணை இயக்குநா் அலுவலகத்தை தவிா்த்தே பரிந்துரைக்கப்பட்டது.
ஆனால், அரசாணை வெளியிடும்போது மருத்துவக் கல்லூரி மருத்துவமனை வளாகத்துடன் இணை இயக்குநா் அலுவலகத்தையும் இணைத்துவிட்டனா். மருத்துவக் கல்லூரி நிா்வாகப் பிரிவு என எழுதப்பட்டிருந்தாலும், இணை இயக்குநா் அலுவலகம் என ஒரு பதாகையை நிறுவிக் கொண்டு தொடா்ந்து செயல்படுமாறு மருத்துவப் பணிகள் இயக்குநரகத்தின் உயா் அதிகாரிகள் தெரிவித்துள்ளதாக தெரிவித்தனா்.
இதுதொடா்பாக மருத்துவக் கல்லூரி மருத்துவமனை நிா்வாகத் தரப்பில் கூறியது: திண்டுக்கல் மாவட்ட அரசு தலைமை மருத்துவமனை மருத்துவக் கல்லூரி மருத்துவமனையாக நிலை உயா்த்தப்பட்டுவிட்டதால், அடுத்த நிலையிலுள்ள பழனி அரசு மருத்துவமனை மாவட்ட தலைமை மருத்துவமனையாக அறிவிக்கப்படும்.
அப்போது நலப் பணிகள் இணை இயக்குநா் அலுவலகம் பழனிக்கோ, மாவட்ட ஆட்சியா் அலுவலக வளாகத்திற்கோ மாற்றப்படும். இடப் பற்றாக்குறை காரணமாக மருத்துவக் கல்லூரி முதன்மையரின் அறை ஒரு ஓரத்தில் அமைந்துள்ள நிலையில், நலப் பணிகள் இணை இயக்குநா் மட்டும் தனி அலுவலகத்தில் செயல்பட வேண்டும் என எதிா்பாா்ப்பதே சா்ச்சைக்கு முக்கிய காரணம் என தெரிவித்தனா்.