பொதுமுடக்கத்தில் கூடுதல் தளா்வுகள் திங்கள்கிழமை (ஜூன் 14) அமலுக்கு வந்துள்ள நிலையில், கொடைக்கானலிலிருந்து பேஷன் புரூட்ஸ் பழங்களை வெளி மாவட்டங்களுக்கு அனுப்பும் பணியில் வியாபாரிகள் தீவிரமாக ஈடுபட்டுள்ளனா்.
கொடைக்கானலில் கடந்த 2 மாதங்களுக்கும் மேலாக பரவலாக நல்ல மழை பெய்தது. இதனால் செண்பகனூா், அட்டக்கடி, சின்னப்பள்ளம், பெரும்பள்ளம், இருதயபுரம், பிரகாசபுரம், உகாா்த்தேநகா், அப்சா்வேட்டரி, சீனிவாசபுரம், குறிஞ்சிநகா், வெள்ளகெவி உள்ளிட்ட பகுதிகளில் விவசாயிகள் தங்களது நிலங்களில் ஊடுபயிராக விளைவிக்கப்பட்டு வந்த பேஷன் புரூட்ஸ் பழங்கள் நன்கு விளைந்தன.
ஆனால் கடந்த ஒரு மாதமாக பொதுமுடக்கம் அமலில் இருந்ததால் அவற்றை பறித்து வெளி மாவட்டங்களுக்கு அனுப்ப முடியாத நிலை இருந்தது. பொதுமுடக்கத் தளா்வுகள் அறிவிக்கப்பட்டதைத் தொடா்ந்து கடந்த 10 நாள்களாக இந்தப் பழங்கள் கொடைக்கானல் பகுதிகளிலுள்ள மொத்த பழக் கடைகளில் விற்பனை செய்யப்பட்டன.
இந்நிலையில் கூடுதல் தளா்வுகள் அறிவிக்கப்பட்டு திங்கள்கிழமை (ஜூன் 14) அமலுக்கு வந்துள்ள நிலையில், இந்த பழங்களை மொத்த வியாபாரிகள் வாகனங்கள் மூலம் வெளி மாவட்டங்களான தேனி, திண்டுக்கல், திருச்சி, மதுரை போன்ற இடங்களுக்கு அனுப்பும் பணியில் ஈடுபட்டு வருகின்றனா்.