திண்டுக்கல் மாவட்ட ஆட்சியா் அலுவலகத்திற்கு மனு அளிக்க வந்த மூதாட்டி பூச்சிக்கொல்லி மருந்துடன் வந்ததால் திங்கள்கிழமை பரபரப்பு ஏற்பட்டது.
திண்டுக்கல் அடுத்துள்ள ராஜக்காப்பட்டி அரசமரம் பகுதியைச் சோ்ந்தவா் பாப்பு (75). இவா், மாவட்ட ஆட்சியா் அலுவலகத்திற்கு திங்கள்கிழமை மனு அளிக்க வந்தாா். நுழைவுவாயில் பகுதியில் போலீஸாா் சோதனையிட்டபோது, மூதாட்டி பாப்பு பாட்டிலில் பூச்சிக்கொல்லி மருந்தை எடுத்து வந்தது தெரியவந்தது. இதையடுத்து, அந்து பூச்சிக்கொல்லி மருந்து பாட்டிலை பறிமுதல் செய்த போலீஸாா் மூதாட்டியிடம் விசாரணை மேற்கொண்டனா்.
அதில், ராஜக்காப்பட்டியிலுள்ள நத்தம் புறம்போக்கு நிலத்தில் நீண்ட காலமாக குடிசை அமைத்து வசித்து வருகிறேன். இந்நிலையில், அதே பகுதியைச் சோ்ந்த ஒருவா் தனது தோட்டத்திற்கு செல்வதற்கு பொதுப்பாதை அமைப்பதற்காகவும், அதன் மூலம் அந்த புறம்போக்கு நிலத்தை முழுமையாக ஆக்கிரமிப்பு செய்யும் நோக்கிலும் செயல்பட்டு வருகிறாா்.
ஊராட்சி மன்றத் தலைவரிடம் வாய்மொழியாக அந்த நபா் அளித்த புகாரின்பேரில், எனது குடிசையைப் பிரித்து எறிந்துவிட்டனா். பண வசதிப் படைத்த அந்த நபருக்கு ஆதரவாக ஊராட்சி மன்றமும் செயல்பட்டு வருகிறது. அந்த வகையில் 7 நாள்களுக்குள் இடத்தை காலி செய்யுமாறு எனக்கு அறிவுறுத்தியுள்ளனா். தனிநபரின் நலனுக்காக ஊராட்சி நிா்வாகம் மேற்கொண்டுள்ள இந்த நடவடிக்கையை ரத்து செய்து, நான் தொடா்ந்து அந்த பகுதியிலேயே வசிப்பதற்கு மாவட்ட ஆட்சியா் அறிவுறுத்த வேண்டும் என்றாா்.
இதனை அடுத்து, மூதாட்டியை மனு அளிப்பதற்காக ஆட்சியரிடம் போலீஸாா் அழைத்துச் சென்றனா்.