திண்டுக்கல்: முதல்வா் உருவ பொம்மையை எரித்த இருவா் குண்டா் தடுப்புச் சட்டத்தின் கீழ் கைது செய்யப்பட்டதற்கு எதிா்ப்புத் தெரிவித்து, திண்டுக்கல் அருகே புதன்கிழமை, வீடுகளில் கருப்புக் கொடி கட்டி போராட்டம் நடைபெற்றது.
தமிழக முதல்வா் மு.க.ஸ்டாலின், கடந்த ஏப்.30 ஆம் தேதி திண்டுக்கல்லில் நடைபெற்ற அரசு நலத்திட்ட உதவிகள் வழங்கும் விழாவில் கலந்து கொண்டாா். அப்போது புதிய தமிழகம் கட்சியினா், திண்டுக்கல் பேருந்து நிலையத்தில் முதல்வரின் உருவபொம்மையை எரித்து திடீா் ஆா்ப்பாட்டத்தில் ஈடுபட்டனா். இதையடுத்து, புதிய தமிழகம் கட்சியின் திண்டுக்கல் மாவட்டச் செயலா் சிவநாதபாண்டியன், மாவட்டத் தலைவா் விஜயகுமாா் உள்ளிட்ட 32 பேரை, திண்டுக்கல் வடக்கு காவல் நிலைய போலீஸாா் கைது செய்தனா்.
இதனிடையே, சிவநாதபாண்டியன் மற்றும் விஜயகுமாா் ஆகியோரை குண்டா் தடுப்புச் சட்டத்தின் கீழ் சிறையில் அடைக்க மாவட்ட ஆட்சியா் ச.விசாகன் உத்தரவிட்டாா். இதற்கு எதிா்ப்பு தெரிவிக்கும் வகையில், சிவநாதபாண்டியன் வசித்து வரும் பாலகிருஷ்ணாபுரம் அடுத்துள்ள மாலப்பட்டி பகுதியில் 10-க்கும் மேற்பட்ட வீடுகளில் பொதுமக்கள் கருப்புக் கொடி கட்டி புதன்கிழமை போராட்டத்தில் ஈடுபட்டனா். இதை அறிந்த திண்டுக்கல் தாலுகா போலீஸாா், மாலப்பட்டிக்கு சென்று கருப்புக் கொடியை அகற்றுமாறு அறிவுறுத்தினா். அதை ஏற்று போராட்டத்தில் ஈடுபட்டவா்கள் கருப்புக் கொடியை அகற்றினா்.