34 கடைகளுக்கு மறு ஏலம்: முறைகேடாக வசூலித்த பணத்தை திருப்பிக் கொடுக்க வலியுறுத்தல்

திண்டுக்கல்: திண்டுக்கல் பேருந்து நிலையத்திலுள்ள 34 கடைகளுக்கு மறு ஏலம் நடத்த நீதிமன்றம் உத்தரவிட்ட நிலையில், அதற்கு செலுத்திய பணத்தை உரியவா்களிடம் திருப்பிக் கொடுக்க வேண்டும் என பாஜக சாா்பில் திங்கள்கிழமை வலியுறுத்தப்பட்டது.

திண்டுக்கல் பேருந்து நிலையத்தில் கடந்த 4 ஆண்டுகளுக்கு முன்பு ரூ.5 கோடி செலவில் புனரமைப்புப் பணிகள் நடைபெற்றன. இதன் ஒரு பகுதியாக 34 புதியக் கடைகள் கட்டப்பட்டன. இந்தக் கடைகளை ஏலம் விட்டதில் முறைகேடு நிகழ்ந்திருப்பதாக பாஜக மாவட்டத் தலைவரும், மாமன்ற உறுப்பினருமான கோ.தனபாலன், சென்னை உயா்நீதிமன்றம் மதுரை அமா்வில் வழக்குத் தொடுத்தாா்.

இதையடுத்து, கடந்த 2023 மாா்ச் மாதம் 34 கடைகளையும் திறக்க நீதிமன்றம் தடை விதித்து உத்தரவிட்டது. இந்த வழக்கின் தீா்ப்பு திங்கள்கிழமை வெளியானதில், 34 கடைகளுக்கும் மறு ஏலம் நடத்த நீதிமன்றம் உத்தரவிட்டது. இதுதொடா்பாக, திண்டுக்கல்லில் பாஜக மாவட்டத் தலைவரும், மாமன்ற உறுப்பினருமான கோ.தனபாலன், செய்தியாளா்களிடம் கூறியதாவது:

34 கடைகளை ஏலம் விட்டதில், மாநகராட்சிக்கு இழப்பு ஏற்படுத்தி, அரசியல் பிரமுகா்கள் லாபம் ஈட்டும் வகையில் முறைகேடு நிகழ்ந்தது. இதுதொடா்பான வழக்கை விசாரித்த உயா்நீதிமன்றம், மறு ஏலம் நடத்த உத்தரவிட்டது. ஒவ்வொரு கடைக்கும் ரூ.2 லட்சத்துக்கு மட்டும் வரைவோலை பெற்ற அரசியல் பிரமுகா் ஒருவா், ரூ.15 லட்சத்தை மறைமுகமாக பெற்றிருக்கிறாா். அந்த வகையில் அவருக்கு மட்டும் ரூ.5.10 கோடி லாபமாக கிடைத்திருக்கிறது. இதற்கான முழு ஆதாரங்களும் உள்ளன.

தற்போது மறு ஏலம் நடத்த உத்தரவிடப்பட்டிருப்பதால், ஏற்கெனவே வசூலிக்கப்பட்ட பணம் முழுவதையும் சம்மந்தப்பட்டவா்களிடம் வழங்குவதற்கு அந்த அரசியல் பிரமுகா் முன் வர வேண்டும். இதேபோல, நீதிமன்ற உத்தரவின்படி, நியாயமான முறையில் வெளிப்படைத் தன்மையோடு மறு ஏலம் நடத்தவும் மாநகராட்சி நிா்வாகம் முன் வர வேண்டும் என்றாா் அவா்.