Enable Javscript for better performance
முறைப்படுத்தாத குடிநீர் விநியோகத்தால் பொதுமக்கள் பாதிப்பு மாநகராட்சி ஒப்பந்த ஊர்திகள் கண்காணிக்கப்பட- Dinamani

சுடச்சுட

    

    முறைப்படுத்தாத குடிநீர் விநியோகத்தால் பொதுமக்கள் பாதிப்பு மாநகராட்சி ஒப்பந்த ஊர்திகள் கண்காணிக்கப்படுமா?

    By DIN  |   Published on : 24th March 2018 04:19 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    மதுரை மாநகராட்சியில் குடிநீர் ஒப்பந்த ஊர்திகள் முறையாக குடிநீர் விநியோகம் செய்வதில்லை என புகார் எழுந்துள்ளது. இவ்வகை ஊர்திகளை கண்காணிக்க மாநகராட்சி உரிய நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.
    மதுரை மாநகராட்சிக்கு உள்பட்ட 95 ஆவது வார்டு முதல் 99 ஆவது வார்டு வரை உள்ள பகுதிகளான திருப்பரங்குன்றம், பசுமலை, ஹார்விபட்டி, பாம்பன்நகர், திருநகர், மகாலெட்சுமி காலனி உள்ளிட்ட பகுதிகளில் வைகை மற்றும் காவிரி கூட்டுக்குடிநீர் திட்டங்கள் மூலம் குடிநீர் விநியோகிக்கப்பட்டு வருகிறது. இதில் காவிரி கூட்டுக்குடிநீர் விநியோகத்தில் மேல்நிலைத் தொட்டிகள் அமைக்கப்படாததால் போதுமான அழுத்தம் கிடைக்காமல் பெரும்பாலான பகுதிகளில் தண்ணீர் விநியோகம் தடைபடுகிறது.
    இந்த ஆண்டு பருவ மழை பொய்த்த காரணத்தால் திருப்பரங்குன்றம், பசுமலை உள்ளிட்ட பகுதிகளில் வைகை கூட்டுக்குடிநீர் 4 நாள்களுக்கு ஒருமுறை விநியோகிக்கப்பட்டு வருகிறது. இதனால் கோடைகாலத்தின் ஆரம்பத்திலேயே தண்ணீர் தட்டுப்பாடு தொடங்கிவிட்டது.
    குழாய் மூலம் குடிநீர் விநியோகம் பாதிக்கப்பட்ட பகுதிகள் மற்றும் குடிநீர் இணைப்பு இல்லாத விரிவாக்கப்பட்ட பகுதிகளுக்கு லாரிகள் மூலம் தண்ணீர் விநியோகிக்கப்படுகிறது. இதற்கு 10 ஆயிரம் லிட்டர் கொள்ளளவு லாரிகள் 6, ஆறாயிரம் லிட்டர் கொள்ளளவில் ஒரு டிராக்டர், 20 ஆயிரம் லிட்டர் கொள்ளளவில் 2 லாரிகள் எனஒப்பந்த அடிப்படையில் இயக்கப்படுகின்றன. இந்த வாகனங்கள் நிலையூர் சாலையில் உள்ள பானாங்குளம், ஹார்விபட்டி சூராவளி மேடு, பாம்பன் நகர், மூலக்கரை, திருப்பரங்குன்றம் மாநகராட்சி அலுவலகத்தின் பின்பகுதி, திருநகர் மாநகராட்சி அலுவலக வளாகம் ஆகிய பகுதிகளில் ஆழ்துளைக் கிணறுகள் மூலம் அமைக்கப்படுள்ள குடிநீர் தொட்டிகளில் இருந்து தண்ணீர் ஏற்றி நாள் ஒன்றுக்கு குறைந்த பட்சம் 8 தடவைகளுக்கு மேல் தண்ணீர் விநியோகிப்பதாக மாநகராட்சி அதிகாரிகள் கூறுகின்றனர்.
    ஆனால் பொதுமக்களின் தண்ணீர் தேவை முழுவதுமாக தீர்க்கப்படுவதில்லை எனவும், பல பகுதிகளுக்கு தண்ணீர் லாரிகள் வருவதில்லை எனவும் புகார்கள் எழுகின்றன.
    மேலும் மின் பராமரிப்பு காலங்களில் நாள் முழுவதும் மின்சாரம் இல்லாத நேரத்தில் கூட தண்ணீர் விநியோகம் செய்திருப்பதாக கணக்கு காட்டப்படுவதாகவும் புகார் கூறப்படுகிறது. மாநகராட்சி தண்ணீர் லாரிகள் சரிவர விநியோகிக்காத நிலையில் தனியார் லாரிகளில் வரும் தண்ணீரையே குடம் ரூ.5 முதல் 10 வரை விலைக்கு வாங்கி பயன்படுத்த வேண்டிய நிலை உள்ளதாகவும் பொதுமக்கள் தெரிவிக்கின்றனர்.
    எனவே, குடிநீர் விநியோகம் செய்யும் ஒப்பந்த லாரிகளில் ஜிபிஆர்எஸ். கருவிகளை பொருத்தி கண்காணித்து முறைப்படுத்த வேண்டும் என பொதுமக்கள் எதிர்பார்க்கின்றனர்.
    'ஊழியர் பற்றாக்குறையால் தவிர்க்க முடியவில்லை'
    இதுகுறித்து மாநகராட்சி பொறியியல் பிரிவு அலுவலர்கள் கூறியது: மாநகராட்சி ஒப்பந்த ஊர்திகளில் முழுமையான கோடை காலங்களில் மட்டுமே ஜிபிஆர்எஸ் கருவிகளை பொருத்தி கண்காணிப்போம். தற்போதே அதுபோல செய்தால் மாநகராட்சிக்கு கூடுதல் செலவாகிறது. இருந்தாலும் ஒப்பந்த அடிப்படையில் ஓட்டுபவர்கள் குடிநீர் விநியோகம் சரிவர செய்வதில்லை எனவும், 10 ஆயிரம் லிட்டர் கொள்ளளவை அவர்கள் சரியாக விநியோகிப்பதில்லை என்பது எங்களுக்கு அடிக்கடி புகார்களாக வருகிறது. எனினும் அவர்களை கண்காணிக்க எங்களிடம் போதிய அளவு ஊழியர்கள் இல்லாததால் இதனை தவிர்க்க முடிவதில்லை என்றார்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai