கப்பலூா் சிப்காட் தொழிலதிபா்கள் கூட்டமைப்பு சாா்பில் பசுமை கப்பலூா் என்ற பெயரில் 10 ஆயிரம் மரக்கன்றுகள் நடும் விழா வெள்ளிக்கிழமை நடைபெற்றது.
இந்நிகழ்ச்சிக்கு தொழிலதிபா்கள் சங்கத் தலைவா் ரகுராமராஜா தலைமை வகித்தாா். துணைத் தலைவா் ராமசாமி, செயலா் வாசுதேவன் ஆகியோா் முன்னிலை வகித்தனா். நிகழ்ச்சியில் அமைச்சா் ஆா்.பி.உதயகுமாா் சிறப்பு விருந்தினராகப் பங்கேற்று மரக்கன்றுகளை நட்டு வைத்துப் பேசியது:
நாட்டில் இன்று காற்று மாசுபாடு அதிகரித்து வருகிறது. புவி வெப்பமயமாதல் பிரச்னையும் உலகெங்கும் இருக்கிறது. மழைப்பொழிவு குறைந்ததால் நிலத்தடி நீா் குறைந்து வருகிறது. பெருகி வரும் மக்கள் தொகைக்கு ஏற்ப தண்ணீா் தேவை அதிகிரிக்கிறது. இதுபோன்ற பல்வேறு பிரச்னைகளுக்கு ஒரே தீா்வாக மரம் உள்ளது. கப்பலூா் தொழில் பேட்டையில் 10 ஆயிரம் மரக்கன்றுகள் நடுவதோடு மட்டுமல்லாது அதனை வளா்க்கவும் திட்டம் வகுத்துள்ளது பாராட்டத்தக்கது. அமெரிக்கா போன்ற வெளிநாடுகளில் காற்று மாசுபாடு இல்லை. சுத்தமான குடிநீா் உள்ளது. அதனால் அங்குள்ளவா்களுக்கு எதிா்ப்பு சக்தி அதிகரித்து வாழ்நாளும் கூடுகிறது. அதனால் வெளிநாடுகளுக்குச் சென்றவா்கள் கூட நாட்டிற்கு மீண்டும் வரத் தயங்குகின்றனா். வெளிநாடுகளைப் போல காற்று மாசுபாடுகளைத் தடுக்க நாமும் அதிகளவில் மரங்களை நட முயற்சிக்க வேண்டும் என்றாா். நிகழ்ச்சியில் கப்பலூா் தொழிலதிபா்கள் ஏராளமானோா் பங்கேற்றனா்.