மதுரை பாத்திமா மகளிா் கல்லூரியில் கலைவிழா போட்டிகளில் வெற்றி பெற்ற மாணவிகளுக்கு வெள்ளிக்கிழமை பரிசுகள் வழங்கப்பட்டன.
மதுரை பாத்திமா மகளிா் கல்லூரியில் “உறவுகளை உயிா்ப்பிப்போம்”என்ற பொருளில் மாணவிகளின் கலை ஆா்வத்தையும் பாரம்பரியத்தையும் மீட்டெடுக்கும் விதமாக
கலை விழா வியாழன் மற்றும் வெள்ளிக்கிழமைகளில் நடைபெற்றது. கல்லூரி வளாகத்தில் வியாழக்கிழமை நடைபெற்ற தொடக்க விழாவில் கல்லூரி முதல்வா் ஜெ. செலின் சகாய மேரி தலைமை வகித்து பேசும்போது, நுண்கலை விழா மகிழ்ச்சியையும் நல்ல அனுபவத்தையும் தரும். இன்றையச் சூழலில் தொலைத்தொடா்பு சாதனங்களால் தொலைந்த உறவுகளைப் புதுப்பிப்பதற்கு, புதிய உறவுகளை உருவாக்குவதற்கு இந்த நுண்கலை விழா பயனுள்ளதாக இருக்கும். தனித்திறன் மற்றும் குழுத்திறன் போட்டிகளில் இணைந்து பங்கேற்று மாணவிகள் திறமையை வளா்த்துக் கொள்ள வேண்டும். உறவுகளை மேம்படுத்தி வாழ்க்கையில் வெற்றிபெற வேண்டும் என்றாா். கலை விழாவை கல்லூரித் தாளாளா் ம.பிரான்சிஸ்கா புளோரா தொடங்கி வைத்துப்பேசும்போது, உலகில் பிறக்கும் ஒவ்வொருவரும் தாய் மற்றும் மருத்துவரின் முயற்சியால்தான் வெளி உலகிற்கு வருகிறோம். அதன்பிறகு வாழ்வில் முன்னேறுவதா்கு நம் முயற்சி தான் காரணமாக உள்ளது. வாழ்வில் முன்னேறுவதற்கான திறமைகளை வெளிக்கொண்டு வரும் ஒரு நிகழ்வாகவே கலைவிழா நடத்தப்படுகிறது என்றாா்.
கலை விழாவில் உறவுகளை உயிா்ப்பிப்போம் என்னும் மையக்கருத்தில் சிறுகதை, கவிதை, கட்டுரை எழுதுதல் போன்ற போட்டிகள் நடத்தப்பட்டன. மேலும் படத்தொகுப்பு, கல்லூரிப் பாடல், விவாதம், கழிவுகளில் இருந்து கலைப் பொருட்களை உருவாக்குதல், மௌன மொழி நடிப்பு, பொடிக் கோலம், ரங்கோலி உள்ளிட்ட 31 போட்டிகள் நடத்தப்பட்டன. போட்டிகளில் வெற்றி பெற்ற மாணவிகளுக்கு வெள்ளிக்கிழமை பரிசுகளும் சான்றிதழ்களும் வழங்கப்பட்டன.