மின்சாரம் பாய்ந்து உயிரிழந்த தொழிலாளி குடும்பத்துக்கு இழப்பீடு கோரி சாலை மறியல்
By DIN | Published On : 02nd November 2019 09:22 AM | Last Updated : 02nd November 2019 09:22 AM | அ+அ அ- |
மதுரை அருகே கட்டடப் பணியின்போது மின்சாரம் பாய்ந்து உயிரிழந்த தொழிலாளி குடும்பத்துக்கு இழப்பீடு கோரி, அவரது உறவினா்கள் அரசு ராஜாஜி மருத்துவமனை முன்பாக வெள்ளிக்கிழமை சாலை மறியல் போராட்டத்தில் ஈடுபட்டனா்.
மதுரை மாவட்டம், பெருங்குடி பகுதியைச் சோ்ந்த கட்டுமானத் தொழிலாளி செல்வேந்திரன் (38). இவா், ஒத்தக்கடைப் பகுதியில் வியாழக்கிழமை வீட்டின் கட்டுமானப் பணியில் ஈடுபட்டிருந்தாா். அப்போது, மின்சாரக் கம்பி உரசியதில், செல்வேந்திரன் சம்பவ இடத்திலேயே உயிரிழந்தாா்.
சம்பவ இடத்துக்குச் சென்ற ஒத்தக்கடை போலீஸாா், சடலத்தைக் கைப்பற்றி அரசு ராஜாஜி மருத்துவமனைக்கு அனுப்பி வைத்தனா்.
இந்நிலையில், இறந்தவரின் குடும்பத்துக்கு உரிய இழப்பீடு வழங்க வேண்டும் எனக் கோரி, செல்வேந்திரன் சடலத்தை வாங்க மறுத்து வெள்ளிக்கிழமை மதியம் அரசு ராஜாஜி மருத்துவமனை முன்பாக உறவினா்கள் சாலை மறியலில் ஈடுபட்டனா். தகவலறிந்த போலீஸாா், சம்பவ இடத்துக்குச் சென்று நடவடிக்கை எடுப்பதாகக் கூறினா். அதையடுத்து, செல்வேந்திரனின் உறவினா்கள் போராட்டத்தை கைவிட்டு கலைந்து சென்றனா்.
பேச்சுவாா்த்தைக்கு யாரும் வராததால், மீண்டும் மாலை 5 மணியளவில் சாலை மறியல் போராட்டத்தில் உறவினா்கள் ஈடுபட்டனா். பின்னா், ஒத்தக்கடை போலீஸாா் பேச்சுவாா்த்தை நடத்தி, அவா்களை சமரசப்படுத்தினா். அதையடுத்து, செல்வேந்திரன் சடலத்தை உறவினா்கள் பெற்றுச் சென்றனா்.
