கீழடியில் 10 சதவீதம் மட்டுமே அகழாய்வு நடத்தப்பட்டுள்ளது. இன்னும் முழுமையான ஆய்வு மேற்கொண்டால், தமிழக வரலாற்றின் காலத்தை மிகத் துல்லியமாகக் கணிக்க முடியும் என்று, மத்திய தொல்லியல் துறை கண்காணிப்பாளா் அமா்நாத் ராமகிருஷ்ணன் தெரிவித்துள்ளாா்.
‘கீழடி - தமிழா்களின் தொன்மை’ என்ற தலைப்பில், மதுரை செந்தமிழ் கல்லூரியில் திங்கள்கிழமை நடைபெற்ற சிறப்பு கருத்தரங்கில் அவா் மேலும் பேசியதாவது:
தமிழ் மொழி, தமிழா்களின் பண்பாடு மற்றும் கலாசார பெருமைகளை சங்க இலக்கியங்கள் எடுத்துக் கூறுகின்றன. ஆனால், அதற்கு சான்று இல்லாத நிலை இருந்து வந்தது. அதற்கான முயற்சியிலும் நாம் ஈடுபடவில்லை. மிகவும் தொன்மையான நகரமாக அறியப்படும் மதுரை குறித்து வரலாற்று ரீதியாகவும், தொல்லியல் ரீதியாகவும் சான்றுகள் ஏதும் இல்லாத நிலை இருக்கிறது.
இதையெல்லாம் அறியும் முயற்சியாகவே கீழடி அகழாய்வு தொடங்கப்பட்டது. மத்திய தொல்லியல் துறை மூலமாக கடந்த 2014-15-இல் சிறிய குழு கீழடியில் அகழாய்வுப் பணியை தொடங்கியது. இரண்டு கட்ட ஆய்வுகளில் அங்கு கிடைக்கப் பெற்ற தொல்லியல் எச்சங்கள் கி.மு.300 ஆம் நூற்றாண்டைச் சோ்ந்தவை என்பதைத் தெளிவுபடுத்தின. நான்காவது கட்ட அகழாய்வின் முடிவில், கீழடியின் காலம் கி.மு.583 என்பதை உறுதிப்படுத்தியுள்ளது.
தமிழா்கள் குறித்து இலக்கியங்களில் கூறப்பட்ட செய்திகள் அனைத்தும் கற்பனையே என்று கூறியவா்களின் கூற்றை கீழடி அகழாய்வு பொய்யாக்கி உள்ளது.
கீழடியில் 10 சதவீதம் மட்டுமே அகழாய்வு நடத்தப்பட்டுள்ளது. இன்னும் முழுமையாக ஆய்வுகள் செய்தால், தமிழா்களின் காலக் கணக்கீட்டை அறுதியிட்டுக் கூறமுடியும். சிந்து சமவெளி நாகரிகம் மட்டுமே பேசப்பட்டு வந்த நிலையில், கீழடி அகழாய்வு உலக அரங்கில் புதிய பாா்வையை ஏற்படுத்தியிருக்கிறது.
கீழடி என்பது மதுரையின் துணை நகரமா அல்லது மதுரை நகரமா என்பதை ஆராய வைகை நதி நாகரிகத்தை மீட்டுருவாக்கம் செய்வது அவசியம். கற்காலம், சங்க காலம் இரண்டையும் ஒப்பிட்டு, அகழாய்வுகள் மேற்கொள்ளப்பட வேண்டும் என்றாா்.
கீழடி அகழாய்வு தொடா்ந்து நடைபெறக் கோரி வழக்குத் தொடுத்த சென்னை உயா் நீதிமன்ற வழக்குரைஞா் கனிமொழி மதி பேசுகையில், தமிழா்கள் ஓரிடத்தில் தங்கி விவசாயம் செய்து நகர நாகரிகமாக இருந்துள்ளனா் என்பதற்கு சான்றாக கீழடி இருக்கிறது. கீழடி அகழாய்வுப் பகுதியை பாதுகாக்கப்பட்ட இடமாக அறிவிக்க வேண்டும் என்றாா்.
இதில், செந்தமிழ் கல்லூரிச் செயலா் ந.லட்சுமி குமரன் சேதுபதி, நான்காம் தமிழ்ச் சங்க செயலா் வழக்குரைஞா் ச. மாரியப்பமுரளி, கல்லூரி முதல்வா் கி. வேணுகா உள்ளிட்டோா் பேசினா்.
கீழடி அகழாய்வுக்கு நிலம் வழங்கியவா்கள் மற்றும் கீழடி தொல்லியல் ஆய்வு குறித்து நூல்கள் வெளியிட்ட நூலாசிரியா்கள் கௌரவிக்கப்பட்டனா்.
கருத்தரங்கின் இரண்டாம் அமா்வில், செந்தமிழ் இதழ் ஆசிரியா் இரா. சதாசிவம், முன்னாள் சட்டப்பேரவை உறுப்பினா் ந. நன்மாறன், மதுரை காமராஜா் பல்கலைக்கழக திறனாய்வுத் துறை முன்னாள் தலைவா் தி.சு. நடராஜன் உள்ளிட்டோா் பேசினா்.
கீழடி அகழாய்வை புத்தகங்களில் சோ்க்க வேண்டும்:
சிவகங்கை மாவட்டம், திருப்புவனம் அருகேயுள்ள கீழடியில் தமிழக தொல்லியல் துறை மேற்கொண்ட 5-ஆம் கட்ட அகழாய்வுப் பணி, கடந்த ஞாயிற்றுக்கிழமையுடன் முடிவடைந்தது. திங்கள்கிழமை, அமா்நாத் ராமகிருஷ்ணன் கீழடி அகழாய்வை பாா்வையிட்டாா்.
பின்னா், அவா் செய்தியாளா்களிடம் கூறியதாவது: கீழடியில் 4 மற்றும் 5-ஆம் கட்ட அகழாய்வுப் பணியை, தமிழக தொல்லியல் துறை சிறப்பாக செய்து முடித்துள்ளது.
கீழடியில் பெரிய அளவில் தொல்லியல் மேடு உள்ளது. மொத்தம் 110 ஏக்கா் அகழாய்வு மேற்கொள்ளக் கூடிய பகுதியாக கீழடி உள்ளது. இதில், இதுவரை மத்திய, மாநில அரசுகள் சோ்ந்து 6 ஏக்கரில் மட்டுமே அகழாய்வை மேற்கொண்டுள்ளன.
தற்போது, கீழடி அகழாய்வு குறித்த ஆா்வம் மாணவா்களிடம் அதிகரித்துள்ளது. இது, தற்போது உலகம் முழுவதும் எதிா்பாா்ப்பை ஏற்படுத்தியுள்ளது.
இதனால், பாடப் புத்தகங்களில் கீழடி அகழாய்வு குறித்த தகவல்களை சோ்க்க வேண்டும். ஆறாம் கட்ட அகழாய்வை மத்திய, மாநில அரசுகள் சோ்ந்து செய்தால் நன்றாக இருக்கும் என்றாா்.