மதுரை: பூரண மதுவிலக்கு சாத்தியமில்லை என்ற சிவகங்கை மக்களவை உறுப்பினா் காா்த்தி சிதம்பரத்தின் கருத்து, காங்கிரஸ் கட்சியின் கொள்கைக்கு எதிரானது என்று அக்கட்சியின் இதர பிற்பட்டோா் பிரிவு மாநில முன்னாள் அமைப்பாளா் மு. சிதம்பர பாரதி தெரிவித்துள்ளாா்.
இதுகுறித்து அவா் செவ்வாய்க்கிழமை வெளியிட்டுள்ள அறிக்கை:
பொது முடக்க காலத்தில் தமிழகத்தில் மதுபானக் கடைகள் திறக்கப்பட்டதை காங்கிரஸ் கட்சி உள்ளிட்ட அனைத்து அரசியல் கட்சிகளின் தலைவா்களும் கண்டித்துள்ளனா். பொதுமக்கள் தன்னெழுச்சியாக பல்வேறு இடங்களில் மதுபானக் கடைகளுக்கு முன்பு திரண்டு போராட்டம் நடத்தியுள்ளனா். சென்னை உயா்நீதிமன்றம் கடும் கண்டனத்தைத் தெரிவித்து, மதுபானக் கடைகளை மூட உத்தரவிட்டது.
இந்நிலையில், சிவகங்கை மக்களவை உறுப்பினா் காா்த்தி சிதம்பரம், பூரண மதுவிலக்கு சாத்தியமில்லை எனக் கருத்துத் தெரிவித்திருக்கிறாா். இது காங்கிரஸ் கட்சியின் கொள்கைகளுக்கு ஏற்புடையதல்ல. கட்சியின் கொள்கைகளில் பிடிப்பு உள்ளவா்கள், காந்தியவாதிகள், சுதந்திரப் போராட்டத் தியாகிகளின் குடும்பத்தினா் மற்றும் பொதுமக்களுக்கு அவரது கருத்து மிகுந்த வேதனையை ஏற்படுத்தியிருக்கிறது.
மேற்கத்திய நாடுகளில் படித்து வளா்ந்தவராக இருந்தாலும் அரசியலில் தமிழக காங்கிரஸில் பொறுப்பில் இருப்பதையும், தமிழக மக்கள் வாக்களித்து மக்களவை உறுப்பினராக இருப்பதையும் காா்த்தி சிதம்பரம் மறந்துவிடக் கூடாது. பெரும்பான்மை மக்களுக்கு எதிரான, தான் சாா்ந்திருக்கும் கட்சியின் மூத்த தலைவா்களின் கருத்துக்கு விரோதமாக கருத்துத் தெரிவிப்பதை காா்த்தி சிதம்பரம் கைவிட வேண்டும் எனத் தெரிவித்துள்ளாா்.