உசிலம்பட்டி அருகே மதுபோதையில் தாயை வெட்டிக் கொன்ற மகன் கைது

உசிலம்பட்டி: மதுரை மாவட்டம் உசிலம்பட்டி அருகே மதுபோதையில் தாயை கொன்ற மகனை உசிலம்பட்டி தாலுகா காவல் துறையினா் செவ்வாய்க்கிழமை கைது செய்தனா்.

உசிலம்பட்டி அடுத்துள்ள வடுகபட்டியைச் சோ்ந்த வேலுச்சாமி மனைவி செல்வி (50). இவா்களுக்கு 3 மகன்கள் உள்ளனா். அதில் இருவருக்கு திருமணம் முடிந்துவிட்டது. மூன்றாவது மகனான மாயக்கண்ணன் (20) கல்லூரிப் படிப்பை பாதியில் நிறுத்திவிட்டு, ஆடு மேய்க்கும் தொழிலில் ஈடுபட்டுள்ளாா். மேலும் அவா் மதுப்பழக்கத்திற்கு அடிமையானதாக கூறப்படுகிறது.

இந்த நிலையில், திங்கள்கிழமை நள்ளிரவில் மது அருந்தி விட்டு வீட்டிற்கு வந்ததை தாய்

கண்டித்துள்ளாா். இதனால் இருவருக்கும் வாக்குவாதம் ஏற்பட்டுள்ளது. அப்போது மாயக்கண்ணன் ஆத்திரத்தில் அரிவாள் மனையால் வெட்டியதில் செல்வி உயிரிழந்தாா்.

இதற்கிடையே இரவில் தோட்டத்திற்கு சென்றிருந்த வேலுச்சாமி செவ்வாய்க்கிழமை காலையில் வீடு திரும்பியபோது இச்சம்பவம் தெரியவந்தது. இதுகுறித்து, உசிலம்பட்டி தாலுகா காவல் துறையினருக்கு தகவல் தெரிவிக்கப்பட்டது. போலீஸாா் வந்து சடலத்தை மீட்டு உசிலம்பட்டி அரசு மருத்துவமனைக்கு பிரேதப்பரிசோதனைக்கு அனுப்பி வைத்தனா். மேலும் மகன் மாயக்கண்ணனைக் கைது செய்தனா்.