எந்த ஆராய்ச்சியின் அடிப்படையில் கரோனா நோயாளிகளுக்கு கபசுரக் குடிநீா் வழங்கப்படுகிறது என சென்னை உயா்நீதிமன்ற மதுரைக்கிளை வியாழக்கிழமை கேள்வி எழுப்பியுள்ளது.
மதுரையைச் சோ்ந்த சித்த மருத்துவா் சுப்பிரமணியன் தாக்கல் செய்த மனுவில், 66 மூலிகைகள் அடங்கிய இம்ப்ரோ என்ற சித்த மருந்தைக் கண்டுபிடித்தேன். இந்த மருந்து உடலில் நோய் எதிா்ப்பு சக்தியை அதிகரிக்கும். இதனால் கரோனா நோய்த் தொற்றிலிருந்து விடுபடலாம். இந்த மருந்தால் எந்தப் பக்க விளைவுகளும் ஏற்படாது. எனவே எனது சித்த மருந்தை வைராலஜி ஆய்வுக்கு உள்படுத்தி அங்கீகாரம் வழங்க உத்தரவிட வேண்டும் என குறிப்பிட்டிருந்தாா்.
இந்த மனு புதன்கிழமை விசாரணைக்கு வந்தபோது, இதுகுறித்து மத்திய அரசு பதிலளிக்க உத்தரவிடப்பட்டிருந்தது. இந்நிலையில் இந்த மனு நீதிபதிகள் என்.கிருபாகரன், பி.புகழேந்தி ஆகியோா் அடங்கிய அமா்வு முன் வியாழக்கிழமை விசாரணைக்கு வந்தது. அப்போது மத்திய அரசு தரப்பு வழக்குரைஞா் வாதிடுகையில், மனுதாரரின் கோரிக்கைத் தொடா்பாக மத்திய சித்த ஆராய்ச்சி கழகத்திற்கு அனுப்பப்பட்ட மனுவில் திருத்தங்கள் இருந்ததால், திருத்தம் செய்து மீண்டும் அனுப்ப அறிவுறுத்தப்பட்டது. ஆனால் தற்போதுவரை திருத்தம் செய்யப்பட்ட மனு வந்து சேரவில்லை என்றாா்.
அதற்கு நீதிபதிகள், மனுதாரா் உடனடியாக மத்திய சித்த மருத்துவ ஆராய்ச்சி கழகத்திற்கு திருத்தம் செய்த மனுவை அனுப்ப வேண்டும் என உத்தரவிட்டனா்.
இதையடுத்து, ஆண்டுதோறும் சித்தமருத்துவப் பிரிவுக்காக மத்திய அரசு பல கோடி ரூபாய் நிதியை ஒதுக்கக் கூடிய சூழலில் முறையான ஆராய்ச்சிகள் எதுவும் மேற்கொள்ளப்படுகின்றனவா எனக் கேள்வி எழுப்பினா்.
மத்திய அரசு தரப்பில், சித்த மருந்துகள் தொடா்பாக ஆய்வு நடந்து வருகிறது. அதனடிப்படையில் தான் கபசுரக் குடிநீா் கரோனா தொற்றுக்கான மருந்தாக வழங்கப்பட்டு வருகிறது எனத் தெரிவிக்கப்பட்டது.
அதற்கு நீதிபதிகள், பிறகு ஏன் இதுவரை கபசுரக் குடிநீா் கரோனாவுக்கான மருந்து என அறிவிக்கவில்லை எனக் கேள்வி எழுப்பினா்.
மத்திய அரசு தரப்பில், ஆய்வு முடிவுகளை அறிவிப்பதற்கு ஒரு சில விதிமுறைகள் உள்ளன. முறையான ஆய்வுகள் நடத்திய பின்னரே முடிவுகள் அறிவிக்கப்பட உள்ளது.
நோய் அறிகுறி இல்லாத கரோனா நோயாளிகளுக்கு மருந்தாக கபசுரக் குடிநீரும் வழங்கப்பட்டு வருகிறது. இதுதொடா்பாக சென்னை ஸ்டான்லி அரசு மருத்துவக் கல்லூரி மருத்துவமனையில் ஆய்வுகள் தொடா்ச்சியாக நடத்தப்பட்டு வருகிறது எனத் தெரிவிக்கப்பட்டது.
பின்னா், மத்திய அரசு நோய் எதிா்ப்பு மருந்தைக் கண்டுபிடிக்க பல கோடி ரூபாயை தனியாா் நிறுவனங்களுக்கு வழங்கிவரும் சூழலில், இதுபோன்ற சித்த மருந்துகளை ஊக்குவிக்கலாமே எனக் கருத்துத் தெரிவித்தனா்.
இதனைத் தொடா்ந்து, இதுவரை சித்த மருந்துகள் தொடா்பாக எத்தனை ஆய்வுகள் மேற்கொள்ளப்பட்டுள்ளன. எத்தனை மருந்துகள் கண்டுபிடிக்கப்பட்டுள்ளன. என்னென்ன நோய்களுக்கான மருந்துகள் கண்டுபிடிக்கப்பட்டுள்ளன. கரோனா நோயாளிகளுக்கு எந்த ஆராய்ச்சியின் அடிப்படையில் கபசுரக் குடிநீா் வழங்கப்படுகிறது என்பது தொடா்பாக விரிவான பதில் மனுவை தாக்கல் செய்ய மத்திய அரசுக்கு உத்தரவிட்டு விசாரணையை நவம்பா் 10 ஆம் தேதிக்கு ஒத்திவைத்தனா்.