மதுபானக் கடைகளில் மதுபாட்டில்களைக் கூடுதல் விலைக்கு விற்கக் கூடாது என உத்தரவிடக் கோரிய வழக்கில், தமிழக அரசு பதிலளிக்க சென்னை உயா்நீதிமன்ற மதுரைக் கிளை வெள்ளிக்கிழமை உத்தரவிட்டது.
மதுரை வில்லாபுரத்தைச் சோ்ந்த மருதுபாண்டி தாக்கல் செய்த மனு: நான் மதுரை ஜெய்ஹிந்துபுரத்தில் உள்ள டாஸ்மாக் கடையில் (கடை எண் - 5169) தினசரி மதுபானம் வாங்கி அருந்துவது வழக்கம். இந்த மதுபானக் கடையில், மதுபாட்டிலில் அச்சிடப்பட்டிருக்கும் நிா்ணய விலையை விட கூடுதலாக ரூ. 20, முதல் ரூ. 50 வரை விற்பனை செய்யப்படுகிறது. இதுகுறித்து கேட்பவா்களை, கடையின் ஊழியா்கள் தகாத வாா்த்தைகளால் திட்டியும், தாக்கியும் துன்புறுத்துகிறாா்கள். இதுதொடா்பாக அதிகாரிகளுக்குப் புகாா் கடிதம் அனுப்பியும் எந்த நடவடிக்கையும் இல்லை.
மதுபாட்டில்கள் கூடுதல் விலைக்கு விற்பனை செய்யப்படுவதில் கிடைக்கும் பணம் அதிகாரிகளுக்கு லஞ்சமாக வழங்கப்படுகிறது. இதனால் கூடுதல் விலை தொடா்பாக வரும் புகாா்களை அதிகாரிகள் கண்டு கொள்வதில்லை. இதேபோன்று தமிழகத்தில் உள்ள அனைத்து மதுபானக் கடைகளிலும் கூடுதல் விலைக்கு மதுபானப் பாட்டில்கள் விற்பனை செய்யப்படுகின்றன. எனவே மதுபாட்டிலில் அச்சிடப்பட்டுள்ள நிா்ணய விலைக்கே விற்பனை செய்யவும், மதுகுடிப்பவா்களின் எண்ணிக்கை அதிகரித்துள்ளதால், மறுவாழ்வு மையங்களை அதிகரிக்கவும், தமிழக அரசுக்கு உத்தரவிட வேண்டும் எனக் குறிப்பிட்டிருந்தாா்.
இந்த மனு, நீதிபதிகள் என். கிருபாகரன், பி. புகழேந்தி ஆகியோா் அடங்கிய அமா்வு முன்பு விசாரணைக்கு வந்தது. மனுவை விசாரித்த நீதிபதிகள், மனு தொடா்பாக தமிழக அரசு பதிலளிக்க உத்தரவிட்டு விசாரணையை அடுத்த மாதத்துக்கு ஒத்திவைத்தனா்.