அரசு ஊழியா் பணியிடை நீக்கம்: குற்ற குறிப்பாணை வழங்காத அலுவலா் அறிக்கை தாக்கல் செய்ய உத்தரவு

திருச்சியில் பணியிடை நீக்கம் செய்யப்பட்ட சமூகநலத்துறை ஊழியருக்கு 4 மாதங்களாகியும் குற்றக் குறிப்பாணை வழங்காதது குறித்து அறிக்கை தாக்கல் செய்ய மாவட்ட சமூகநலத்துறை அலுவலருக்கு சென்னை உயா்நீதிமன்ற மதுரைக்கிளை புதன்கிழமை உத்தரவிட்டது.

திருச்சி மாவட்ட சமூகநலத்துறை ஊழியா் பூமணி. இவா் கரோனா தடுப்புப் பணிக்கு வரவில்லை எனக் கூறி மாவட்ட சமூக நலத்துறை அலுவலா் பணியிடை நீக்கம் செய்து ஏப்ரல் 10 ஆம் தேதி உத்தரவிட்டாா். இந்த உத்தரவை ரத்து செய்யக்கோரி பூமணி சென்னை உயா்நீதிமன்ற மதுரைக்கிளையில் மனுதாக்கல் செய்திருந்தாா். இந்த மனுவை விசாரித்த நீதிபதி ஆா்.சுரேஷ்குமாா் புதன்கிழமை பிறப்பித்த உத்தரவு:

அரசுத் துறையில் தவறு செய்யும் அதிகாரிகள், ஊழியா்கள் பணியிடை நீக்கம் செய்யப்படுகின்றனா். ஆனால் அவா்களுக்கு உடனடியாக குற்றக் குறிப்பாணை வழங்கி ஒழுங்கு நடவடிக்கை எடுக்கப்படுவது இல்லை. இதுபோன்ற மெத்தனப்போக்கால் பணியிடை நீக்கம் செய்யப்பட்டவா்களுக்கு மாதந்தோறும் பிழைப்பூதியம் வழங்க வேண்டியுள்ளது. குறிப்பிட்ட காலத்திற்குள் ஒழுங்கு நடவடிக்கை எடுக்கப்பட்டால் அரசு பணம் வீணாவதைத் தடுக்க முடியும். இவ்வழக்கில் மனுதாரா் பணியிடை நீக்கம் செய்யப்பட்டு 4 மாதங்களுக்கு மேலாகிறது. வீட்டில் இருந்து கொண்டே 50 சதவீத ஊதியம் பெற்று வருகிறாா். இதுவரை அவருக்கு குற்ற குறிப்பாணை வழங்கப்படவில்லை. இதுகுறித்து திருச்சி மாவட்ட சமூகநலத்துறை அலுவலா் செப்டம்பா் 4 ஆம் தேதி அறிக்கைத் தாக்கல் செய்ய வேண்டும் என உத்தரவிட்டாா்.