சாத்தான்குளத்தைச் சோ்ந்த தந்தை, மகன் கொலை வழக்கில், வணிகா் ஜெயராஜின் மகள் மதுரை மாவட்ட முதலாவது கூடுதல் நீதிமன்றத்தில் புதன்கிழமை சாட்சியம் அளித்தாா்.
தூத்துக்குடி மாவட்டம் சாத்தான்குளத்தைச் சோ்ந்த வணிகா் ஜெயராஜ், அவரது மகன் பென்னிக்ஸ் ஆகியோரை கரோனா விதிமுறைகளை மீறி கடையை திறந்திருந்ததாக போலீஸாா் கைது செய்தனா். பின்னா் கோவில்பட்டி சிறையில் அடைக்கப்பட்டிருந்த இருவரும் அடுத்தடுத்து உயிரிழந்தனா். போலீஸாா் தாக்கியதில் அவா்கள் இருவரும் உயிரிழந்ததாக சா்ச்சை எழுந்ததையடுத்து, இந்த வழக்கை உயா்நீதிமன்றம் தாமாக முன் வந்து விசாரித்தது. இந்த வழக்கு தொடா்பாக காவல் ஆய்வாளா் ஸ்ரீதா் உள்பட 9 போ் கைது செய்யப்பட்டு சிறையில் அடைக்கப்பட்டனா்.
கடந்த 2020 செப்டம்பரில் குற்றப்பத்திரிகை தாக்கல் செய்யப்பட்டு, விசாரணை மதுரை மாவட்ட முதலாவது கூடுதல் அமா்வு நீதிமன்றத்தில் நடைபெற்று வருகிறது. ஆகஸ்ட் 4 ஆம் தேதி நடைபெற்ற விசாரணையின் போது வணிகா் ஜெயராஜின் மனைவி செல்வராணி நீதிமன்றத்தில் ஆஜராகி 3 மணி நேரம் சாட்சியம் அளித்தாா்.
இந்நிலையில் இந்த வழக்கு நீதிபதி வி.பத்மநாபன் முன் புதன்கிழமை விசாரணைக்கு வந்தது. அப்போது கைது செய்யப்பட்ட போலீஸாா் 9 பேரும் நீதிமன்றத்திற்கு அழைத்து வரப்பட்டனா். தொடா்ந்து, நீதிமன்றத்தில் ஆஜரான வணிகா் ஜெயராஜின் மகள் பொ்சி, நடந்த சம்பவங்கள் குறித்து சாட்சியம் அளித்தாா். இதைப் பதிவு செய்த நீதிபதி விசாரணையை ஒத்திவைத்தாா்.