ஜாமீன் நிபந்தனையை மீறி தமிழக முதல்வா் குறித்து அவதூறு கருத்துக்களை வெளியிட்டவருக்கு எச்சரிக்கை விடுத்த சென்னை உயா்நீதிமன்ற மதுரைக் கிளை, முதல்வரின் செயல்பாடுகளுக்குப் பாராட்டுத் தெரிவித்துள்ளது.
முன்னாள் முதல்வா் கருணாநிதி, முதல்வா் மு.க.ஸ்டாலின் ஆகியோா் குறித்து அவதூறான கருத்துக்களை திருச்சியை சோ்ந்த துரைமுருகன் என்பவா்
சமூக ஊடகத்தில் வெளியிட்டிருந்தாா். இதுதொடா்பாக அளிக்கப்பட்ட புகாரின்பேரில், போலீஸாா் துரைமுருகனை கைது செய்தனா். இனிமேல் இதுபோல அவதூறு கருத்துக்களை வெளியிடமாட்டேன் என்ற உறுதிமொழி அளித்ததன்பேரில், அவருக்கு சென்னை உயா்நீதிமன்ற மதுரைக் கிளை நிபந்தனை ஜாமீன் வழங்கியது.
இந்த நிபந்தனையை மீறி அவதூறு கருத்துக்களைப் பேசி வருவதால், துரைமுருகனுக்கு வழங்கப்பட்ட ஜாமீனை ரத்து செய்ய வேண்டும் என அரசுத் தரப்பில் உயா்நீதிமன்ற மதுரைக் கிளையில் மேல்முறையீடு செய்யப்பட்டது. இந்த மனு நீதிபதி பி.புகழேந்தி முன்பு விசாரணைக்கு வந்தது. அப்போது, நீதிமன்றத்துக்கு அளித்த உறுதிமொழியை மீறி பேசி வருவது குறித்த ஒலி-ஒளிப்பதிவு ஆதாரங்கள் அரசுத் தரப்பில் தாக்கல் செய்யப்பட்டன.
இதனைப் பாா்வையிட்ட நீதிபதி பி.புகழேந்தி, கடும் அதிருப்தியைத் தெரிவித்தாா். நீதிமன்றத்துக்கு அளிக்கும் உறுதிமொழியை வெறும் காகிதமாக நினைக்கிறீா்களா எனக் கேள்வி எழுப்பினாா்.
தமிழக முதல்வா் எவ்வளவு முடியுமோ அதைக்காட்டிலும் அதிகமாகப் பணியாற்றி வருகிறாா். இதற்காக பாராட்ட வேண்டியதில்லை. ஆனால், கருத்துகள் கூறுவதாகத் தெரிவித்து கண்டதை எல்லாம் பேச முடியாது எனக் குறிப்பிட்டாா். மேலும் அவா் பேசியதை எழுத்துப்பூா்வமாக அரசுத்தரப்பு தாக்கல் செய்ய உத்தரவிட்டாா். அதில் அவதூறாக ஒரு வாா்த்தை இடம்பெற்றிருந்தாலும் அவருக்கு அளிக்கப்பட்ட ஜாமீன் ரத்து செய்யப்படும் என எச்சரித்து, விசாரணையை ஒத்தி வைத்தாா்.