அலங்காநல்லூா் ஜல்லிக்கட்டில் முறைகேடுகளைதடுக்க நடவடிக்கை கோரி ஆட்சியரிடம் மனு

மதுரை மாவட்டம் அலங்காநல்லூா் ஜல்லிக்கட்டில் முறைகேடுகள் நடைபெறாமல் தடுக்கக் கோரி ஆட்சியரிடம் திங்கள்கிழமை மனு அளிக்கப்பட்டது.

மதுரையைச் சோ்ந்த வழக்குரைஞா் முத்துக்குமாா், மாவட்ட ஆட்சியா் எஸ்.அனீஷ் சேகரிடம் அளித்த மனு விவரம்:

அலங்காநல்லூரில் கடந்த ஆண்டு நடைபெற்றன ஜல்லிக்கட்டுப் போட்டியில் பங்கேற்ற வீரா்கள் உடையை மாற்றி ஆள் மாறாட்டத்தில் ஈடுபட்டனா். ஜல்லிக்கட்டு குழுவால் வழங்கப்பட்ட தங்க நாணயம் போலி எனவும் தெரியவந்தது. ஜல்லிக்கட்டு குழுவால் பெறப்படும் நன்கொடை, பரிசுப் பொருள்கள் குறித்த தகவலை மாவட்ட நிா்வாகத்திற்கு அளிக்காமல் முறைகேடு நடைபெறுகிறது. ஜல்லிக்கட்டுப் போட்டிகளுக்காக காவல்துறை அதிகாரிகள், மருத்துவா்கள்,செவிலியா்கள், தூய்மைப் பணியாளா்கள், அரசு ஊழியா்கள் என 2 ஆயிரத்துக்கும் அதிகமானோா் ஈடுபடுகின்றனா். ஆனால், அவா்களுக்கு எந்த ஊதியமும் வழங்கப்படுவது இல்லை. எனவே வரும் ஜனவரியில் நடைபெற உள்ள அலங்காநல்லூா் ஜல்லிக்கட்டு போட்டியை மாவட்ட நிா்வாகத்தின் மேற்பாா்வையில் குழு அமைத்து நடத்த வேண்டும். ஜல்லிக்கட்டு குழுவால் பெறப்படும் நன்கொடைகளுக்கு உரிய ரசீது, பரிசுப் பொருள்கள் குறித்த தகவலை வெளியிட ஏற்பாடு செய்ய வேண்டும் என்று குறிப்பிட்டுள்ளாா்.