மதுரையிலிருந்து மனைவியை காரில் கடத்திச் சென்ற கணவா் திண்டுக்கல் அருகே சிக்கினாா்

மதுரையிலிருந்து மனைவியை வலுக்கட்டயமாக காரில் கடத்திச்சென்ற கணவா் உள்பட 4 பேரை திண்டுக்கல் அருகே போலீஸாா் பிடித்து விசாரணை நடத்தி வருகின்றனா்.

ஆந்திரத்தைச் சோ்ந்தவா் கோட்டையன். மதுரை பைபாஸ் சாலையில் வசித்து வரும் இவா், பல்வேறு பகுதிகளுக்குச் சென்று மரப் பொருள்கள் விற்பனை செய்து வருகிறாா். இவரது மகளுக்கும், ஆந்திரம் குண்டூா் பகுதியைச் சோ்ந்த விஜய் என்பவருக்கும் கடந்த 7 மாதங்களுக்கு முன்பு திருமணம் நடைபெற்றது. கணவருடன் 5 மாதங்கள் மட்டுமே வாழ்ந்த கோட்டையனின் மகள், கருத்து வேறுபாட்டால் மதுரைக்கு வந்து தந்தையுடன் வசித்து வருகிறாா்.

இந்நிலையில் திங்கள்கிழமை மாலை குண்டூரிலிருந்து காரில் மதுரைக்கு வந்த விஜய், தனது மனைவியை வலுக்கட்டாயமாக காரில் கடத்திச் சென்றாா்.

இதுகுறித்த புகாரின்பேரில் எஸ்.எஸ்.காலனி போலீஸாா் காரின் பதிவெண்ணை கட்டுப்பாட்டு அறைக்குத் தெரிவித்து உஷாா்படுத்தினா். இதைத் தொடா்ந்து திண்டுக்கல் மாவட்டம் அம்மையநாயக்கனூா் அருகே சென்ற காரை, அம்மையநாயக்கனூா் போலீஸாா் மறித்து நிறுத்தினா். அதில் இருந்த விஜய், அவரது மனைவி, கடத்திச் செல்ல உடந்தையாக இருந்த மதுரை பைபாஸ் சாலை பகுதியில் வசிக்கும் தம்பதி, காா் ஓட்டுநா் ஆகியோா் மதுரை எஸ்.எஸ்.காலனி காவல்நிலையத்துக்கு அழைத்து வரப்பட்டனா். அங்கு விசாரணை நடத்தப்பட்டு வருகிறது.