மதுரையில் விசாரணைக்கு அழைத்துச் செல்லப்பட்ட இளைஞரைத் தாக்கியதாக காவல் சாா்பு -ஆய்வாளா் இடமாற்றம் செய்யப்பட்டநிலையில், தற்போது அவரை பணியிடை நீக்கம் செய்து காவல் ஆணையா் பிரேம் ஆனந்த் சின்ஹா வெள்ளிக்கிழமை உத்தரவிட்டுள்ளாா்.
மதுரை சுப்பிரமணியபுரம் ஹரிஜனக் காலனியைச் சோ்ந்த திருப்பதி (28) அரசு ராஜாஜி மருத்துவமனையில் கரோனா தடுப்பு தற்காலிகப் பணியாளராக பணியாற்றி வருகிறாா். தனது நண்பா்கள் 3 பேருடன் பாண்டி கோயிலில் பிப். 8 ஆம் தேதி நடைபெற்ற விழாவிற்கு டோல் (இசைக் கருவி) அடிக்கச் சென்ற திருப்பதி, காரில் வீடு திரும்பினாா். சுப்பிரமணியபுரம் அருகே காரை நிறுத்தி போலீஸாா் விசாரித்தபோது, வாக்குவாதம் ஏற்பட்டுள்ளது. இதையடுத்து போலீஸாா் திருப்பதி உள்பட 4 பேரையும் ஜெயஹிந்த்புரம் காவல் நிலையத்திற்கு அழைத்துச் சென்றுள்ளனா். அப்போது சமுதாயத்தின் பெயரை இழிவாகக் கூறி அவா்களைப் போலீஸாா் தாக்கியதாகக் கூறப்படுகிறது. இதில் பலத்த காயமடைந்த திருப்பதி அரசு ராஜாஜி மருத்துவமனையில் அனுமதிக்கப்பட்டு சிகிச்சைப் பெற்று வருகிறாா்.
இதையடுத்து ஜெய்ஹிந்த்புரம் காவல் சாா்பு- ஆய்வாளா் செல்வகுமாா் உள்பட 5 போலீஸாா் மீது நடவடிக்கை எடுக்க வேண்டும் என திருப்பதியின் குடும்பத்தினா் மற்றும் அவரது சமுதாயத்தைச் சோ்ந்த அமைப்பினா் காவல் ஆணையரிடம் புகாா் அளித்தனா். முதல் கட்ட நடவடிக்கையாக காவல் சாா்பு-ஆய்வாளா் செல்வகுமாா் ஆயுதப்படை பிரிவுக்கு இடமாற்றம் செய்யப்பட்டாா்.
இந்நிலையில், போலீஸாா் மீது நடவடிக்கை எடுக்க வேண்டும் என மாவட்ட வருவாய் அலுவலா் ஜி.செந்தில்குமாரியிடம் கோரிக்கை மனு அளிக்கப்பட்டது. அதன் பேரில் கோட்டாட்சியா் தலைமையில் விசாரணை நடைபெற்றது. இதில், திருப்பதியை போலீஸாா் தாக்கியது உறுதி செய்யப்பட்டது. அவா் மீது துறைரீதியான நடவடிக்கை எடுக்க பரிந்துரை செய்யப்பட்டது. அதனடிப்படையில் காவல் சாா்பு- ஆய்வாளா் செல்வகுமாரை பணியிடை நீக்கம் செய்து காவல் ஆணையா் பிரேம் ஆனந்த் சின்ஹா வெள்ளிக்கிழமை உத்தரவிட்டாா்.