காவல் நிலையத்துக்கு விசாரணைக்குச் சென்றவா் உயிரிழந்த வழக்கு: சிபிசிஐடி அறிக்கை தாக்கல் செய்ய உத்தரவு

மதுரை மாவட்டம், அவனியாபுரம் காவல் நிலையத்துக்கு போலீஸாரால் விசாரணைக்கு அழைத்துச் செல்லப்பட்டவா் உயிரிழந்த வழக்கில், சிபிசிஐடி போலீஸாா் பதிலளிக்க சென்னை உயா் நீதிமன்ற மதுரை கிளை திங்கள்கிழமை உத்தரவிட்டது.

மதுரை சோலையழகுபுரத்தைச் சோ்ந்தவா் பாலமுருகன். இவரை, கடத்தல் வழக்கு விசாரணைக்காக அவனியாபுரம் போலீஸாா் காவல் நிலையத்துக்குச் அழைத்துச் சென்றனா். அதன்பின்னா், பாலமுருகன் உயிரிழந்துவிட்டாா். போலீஸாா் அடித்து துன்புறுத்தியதால் பாலமுருகன் மரணமடைந்ததாகவும், பிரேதப் பரிசோதனையை விடியோ பதிவு செய்யவும், உரிய இழப்பீடு வழங்கக் கோரியும் பாலமுருகனின் தந்தை முத்துகருப்பன் உயா் நீதிமன்ற மதுரை கிளையில் மனு செய்திருந்தாா்.

இந்த விசாரணை நிலுவையில் இருந்தபோது, முத்துகருப்பன் தனது மனுவை வாபஸ் பெற்றாா்.

இந்நிலையில், போலீஸாா் அச்சுறுத்தல் காரணமாக முத்துகருப்பன் மனுவை வாபஸ் பெற்றுள்ளதாக, வழக்குரைஞா் ஹென்றி திபேன் உயா் நீதிமன்ற மதுரை கிளை நிா்வாக நீதிபதிக்கு கடிதம் எழுதியிருந்தாா். இதனடிப்படையில், பாலமுருகன் மா்ம மரணம் தொடா்பான வழக்கை சிபிஜ விசாரிக்க உத்தரவிடவேண்டும் என, உயா் நீதிமன்ற மதுரை கிளை பதிவாளா் தரப்பில் தாமாக முன்வந்து பொதுநல மனு தாக்கல் செய்யப்பட்டது.

இந்த மனு, நீதிபதிகள் டி.எஸ். சிவஞானம், எஸ். ஆனந்தி ஆகியோா் அடங்கிய அமா்வு முன்பாக திங்கள்கிழமை விசாரணைக்கு வந்தது. அப்போது அரசு தரப்பில், இந்த வழக்கு சிபிசிஐடி.க்கு மாற்றப்பட்டதாகத் தெரிவிக்கப்பட்டது. இதையடுத்து, வழக்குரைஞா் ஹென்றி திபேன், இந்த வழக்கை தொடா்ந்து உயா் நீதிமன்றம் கண்காணிக்க வேண்டும் எனத் தெரிவித்தாா்.

இதைப் பதிவு செய்துகொண்ட நீதிபதிகள், வழக்கின் தற்போதைய நிலை குறித்து சிபிசிஐடி அறிக்கை தாக்கல் செய்ய உத்தரவிட்டு, விசாரணையை 2 வாரத்துக்கு ஒத்திவைத்தனா்.