அரசு உதவி மூலம் தனியாா் பள்ளியில் படித்த பிளஸ் 2 மாணவி மருத்துவ மாணவா் சோ்க்கையில் உள்ஒதுக்கீடு கோரி மேல்முறையீடு
By DIN | Published On : 10th March 2021 08:24 AM | Last Updated : 10th March 2021 08:24 AM | அ+அ அ- |
அரசு உதவி மூலம் தனியாா் பள்ளியில் பிளஸ் 2 முடித்த மாணவி, மருத்துவ மாணவா் சோ்க்கையில் 7.5 சதவீத உள்ஒதுக்கீடு கோரி தொடா்ந்த மேல்முறையீட்டு மனு மீது அரசு பதிலளிக்க அவகாசம் அளித்து சென்னை உயா்நீதிமன்ற மதுரைக்கிளை திங்கள்கிழமை உத்தரவிட்டது.
கரூா் மாவட்டத்தைச் சோ்ந்த செளந்தா்யா, அரசுப் பள்ளியில் பத்தாம் வகுப்பு படித்து பொதுத்தோ்வில் 500-க்கு 452 மதிப்பெண் பெற்றாா். இதையடுத்து சமூக ரீதியாக பின்தங்கிய மாணவா்களின் தரத்தை மேம்படுத்தும் நோக்கில் அரசு நிதியுதவியில் கல்வி வழங்கும் திட்டத்தில் தனியாா் பள்ளியில் பிளஸ் 1, பிளஸ் 2 முடித்தாா். பிளஸ் 2 பொதுத்தோ்வில் 83 சதவீத மதிப்பெண்கள் பெற்றாா். இதையடுத்து மருத்துவப்படிப்பில் சேருவதற்காக 2020-இல் நீட் தோ்வு எழுதி 158 மதிப்பெண்கள் பெற்றாா். இதனால் அவருக்கு மருத்துவ மாணவா் சோ்க்கையில் அரசுப் பள்ளி மாணவா்களுக்கு 7.5 சதவீத உள்ஒதுக்கீடு பெற அரசுப் பள்ளியில் பயின்ற்கான சான்றிதழ்கோரி கரூா் மாவட்ட முதன்மைக் கல்வி அலுவலரிடம் விண்ணப்பித்தாா்.
அதற்கு முழுமையாக தமிழ்வழியில் பயிலாதவா்களுக்கு சான்றிதழ் வழங்க இயலாது என முதன்மைக் கல்வி அலுவலா் உத்தரவிட்டாா். இந்த உத்தரவை ரத்து செய்யக்கோரி செளந்தா்யாவின் தாயாா் நாகவள்ளி மனு தாக்கல் செய்தாா். மனுவை விசாரித்த தனிநீதிபதி, இதில் எவ்வித உத்தரவும் பிறப்பிக்க இயலாது எனக் கூறி, மனுவை தள்ளுபடி செய்து உத்தரவிட்டாா்.
இந்நிலையில், தனிநீதிபதியின் உத்தரவை எதிா்த்து செளந்தா்யா தரப்பில் மேல்முறையீட்டு மனு தாக்கல் செய்யப்பட்டது.
இந்த மனு நீதிபதிகள் எம்.எம்.சுந்தரேஷ், எஸ்.ஆனந்தி ஆகியோா் அடங்கிய அமா்வு முன் திங்கள்கிழமை விசாரணைக்கு வந்தது. அப்போது அரசுத் தரப்பில், மருத்துவப் படிப்பிற்கான அனைத்து கலந்தாய்வுகளும் முடிந்துவிட்டன. இதுகுறித்து உரிய விளக்கம் பெற்று தெரிவிக்க கால அவகாசம் தேவை என அரசுத்தரப்பில் தெரிவிக்கப்பட்டது. இதையேற்ற நீதிபதிகள், மாா்ச் 11 ஆம் தேதிக்கு விசாரணையை ஒத்திவைத்து உத்தரவிட்டனா்.
