சோழவந்தான் (தனி) தொகுதியில் நாம் தமிழா் கட்சி சாா்பில் போட்டியிடும் ஜி.செங்கண்ணன் செவ்வாய்க்கிழமை வேட்புமனு தாக்கல் செய்தாா்.
அக்கட்சியின் மதுரை மண்டல செயலராகப் பொறுப்பு வகிக்கும் செங்கண்ணன், வாடிப்பட்டி வட்டாட்சியா் அலுவலகத்தில் தோ்தல் நடத்தும் அலுவலா் பி.ஜஸ்டின் ஜெயபாலிடம் வேட்புமனுவை தாக்கல் செய்தாா். மாற்று வேட்பாளராக ஆ.ஆனந்தகுமாா் வேட்புமனு தாக்கல் செய்துள்ளாா். செங்கண்ணன், தனது பெயரிலும், தனது மனைவி பெயரிலும் ரூ.1 லட்சத்து 32 ஆயிரத்து 178 மதிப்பிலான அசையும் சொத்து மற்றும் ரூ.2.5 லட்சம் மதிப்பிலான அசையா சொத்து இருப்பதாகத் தெரிவித்துள்ளாா்.
மதுரை கிழக்கு: மதுரைகிழக்கு தொகுதி நாம் தமிழா் கட்சி வேட்பாளா் ஜெ.லதா மதுரை கிழக்கு தொகுதியின் தோ்தல் நடத்தும் அலுவலரான வருவாய் கோட்டாட்சியா் வ.முருகானந்தத்திடம் வேட்பு மனு தாக்கல் செய்தாா். அப்போது கட்சியின் மதுரை மாவட்டச் செயலா் இருளாண்டி, கிழக்கு ஒன்றிய செயலா் தினகரன் உடனிருந்தனா்.
சொத்து விவரம்:ஜெ.லதா பெயரிலும், அவரது கணவா் பெயரிலும், இரு மகன்கள் பெயரிலும் உள்ள மொத்த சொத்துகளின் மதிப்பு ரூ.2 கோடியே 66 லட்சத்து 16 ஆயிரத்து 497 . இதில், அசையும் சொத்துக்களின் மதிப்பு ரூ.56 லட்சத்து 16 ஆயிரத்து 497, அசையா சொத்துக்களின் மதிப்பு ரூ.2 கோடியே 10 லட்சம். மேலும் ரூ.1 கோடியே 26 லட்சத்து 30 ஆயிரத்து 730 கடன் உள்ளதாக குறிப்பிட்டுள்ளாா். லதாவுக்கு, மாற்று வேட்பாளராக மதுரை சக்கிமங்கலத்தைச் சோ்ந்த வெ.வீரலட்சுமி வேட்பு மனு தாக்கல் செய்தாா்.
திப்புசுல்தான் கட்சி வேட்பாளா் வேட்பு மனு தாக்கல்: மதுரை அருகேயுள்ள ஒத்தக்கடையைச் சோ்ந்த திப்புசுல்தான் கட்சியின் மாநில அமைப்புச் செயலா் ஏ.கே.முஸ்தாக் முகமது(63) வேட்புமனு தாக்கல் செய்தாா். வேட்பாளா் பெயரிலும், அவருடைய மனைவி பெயரிலும் உள்ள மொத்த சொத்துக்களின் மதிப்பு ரூ.4 லட்சத்து 5 ஆயிரம் என வேட்பு மனுவில் தெரிவிக்கப்பட்டுள்ளது.