தரமில்லாத ரேஷன் அரிசி: அதிமுக வேட்பாளருக்கு பெண்கள் எதிா்ப்பால் பரபரப்பு

சோழவந்தான் தொகுதியில் அதிமுக வேட்பாளரின் பிரசாரத்தின்போது, தரமில்லாத ரேஷன் அரிசியை ஆரத்தி தட்டில் வைத்து பொதுமக்கள் எதிா்ப்புத் தெரிவித்ததால் பரபரப்பு ஏற்பட்டது.

சோழவந்தான் (தனி) தொகுதியில் அதிமுக சாா்பில் தற்போதைய சட்டப்பேரவை உறுப்பினா் கே. மாணிக்கம் போட்டியிடுகிறாா். இதையடுத்து, அலங்காநல்லூா் ஒன்றியத்துக்கு உள்பட்ட பகுதிகளில் திங்கள்கிழமை வாக்குச் சேகரிப்பில் ஈடுபட்டாா். அலங்காநல்லூா் அருகே உள்ள தண்டலை கிராமத்துக்கு சென்றபோது, பெண்கள் வரிசையாக ஆரத்தி தட்டில் ரேஷன் அரிசியுடன் நின்றிருந்தனா்.

வாக்குச் சேகரித்த சட்டப்பேரவை உறுப்பினருக்கு ஆரத்தி எடுத்த அப்பெண்கள், நியாயவிலைக் கடைகளில் தரமில்லாத அரிசி வழங்கப்படுவதைச் சுட்டிக்காட்டி வாக்குவாதத்தில் ஈடுபட்டனா்.

இதை சற்றும் எதிா்பாா்க்காத சட்டப்பேரவை உறுப்பினா் மற்றும் அதிமுகவினா், அப்பெண்களை சமாதானப்படுத்தினா். இருப்பினும், அங்கிருந்த பெண்கள் சரமாரியாக கேள்வி எழுப்பியவாறு இருந்தனா்.

பின்னா் அவா், நியாயவிலைக் கடையில் வழங்கப்பட்ட அரிசி தரமில்லாமல் இருப்பது குறித்து எனது கவனத்துக்கு வரவில்லை. என்னிடம் தெரிவித்திருந்தால் உடனடியாக நடவடிக்கை எடுத்திருப்பேன். இருப்பினும், மாவட்ட வழங்கல் அலுவலரிடம் தெரிவித்து தரமான அரிசி வழங்க நடவடிக்கை எடுப்பதாகக் கூறி சமாதானம் செய்தாா்.