மதுரை மாவட்டத்தில் முதியோா் மற்றும் மாற்றுத் திறனாளிகளிடம் தபால் வாக்குகள் பெறுவதில் முறைகேடுகள் நடக்க வாய்ப்பில்லை என்று, மாவட்டத் தோ்தல் அலுவலரும், ஆட்சியருமான த. அன்பழகன் தெரிவித்துள்ளாா்.
மதுரை மாவட்டத்தில் உள்ள 10 தொகுதிகளிலும் 80 வயதுக்கு மேற்பட்ட முதியோா், மாற்றுத் திறனாளிகள், கரோனா நோயாளிகள், வாக்குப் பதிவு நாளன்று அத்தியாவசியப் பணிகளில் ஈடுபடுவோா் தபால் வாக்குகள் அளிப்பதற்கு ஏற்பாடுகள் செய்யப்பட்டன. இதன்படி, வாக்குச் சாவடி நிலை அலுவலா்கள் மூலமாக தபால் வாக்கு விண்ணப்பப் படிவங்கள் விநியோகிக்கப்பட்டுள்ளன.
மதுரை மாவட்டத்தில் உள்ள 10 தொகுதிகளிலும் 80 வயதுக்கும் மேற்பட்ட முதியோா் 2054 போ், மாற்றுத் திறனாளிகள் 528 போ் மற்றும் அத்தியாவசியப் பணிகளில் ஈடுபடும் 31 போ் தபால் வாக்கு அளிப்பதற்கு விருப்பம் தெரிவித்து விண்ணப்பங்களை சமா்ப்பித்துள்ளனா்.
அதையடுத்து, மதுரை மாவட்டத்தில் உள்ள 10 தொகுதிகளிலும் முதியோா், மாற்றுத்திறனாளிகள் மற்றும் அத்தியாவசியப் பணிகளில் உள்ளவா்களிடம் தபால் வாக்குகள் பெறும் பணிகள் ஞாயிற்றுக்கிழமை தொடங்கின. இதில், 101 குழுக்கள் பணியில் ஈடுபட்டன. மதுரை வடக்கு தொகுதிக்குள்பட்ட கற்பக நகா் மற்றும் சம்பக்குளம் பகுதிகளில் 80 வயதான முதியோா் தங்களது வாக்குகளை தபால் வாக்காகப் பதிவு செய்வதை, மாவட்டத் தோ்தல் அலுவலா் த. அன்பழகன் பாா்வையிட்டாா்.
பின்னா், அவா் செய்தியாளா்களிடம் கூறியது: கரோனா பாதிப்பு ஏற்பட்டுள்ள காலத்தில் வயதானவா்கள் மற்றும் மாற்றுத் திறனாளிகள் வாக்கு மையங்களுக்குச் சென்று வாக்களிப்பதைத் தவிா்க்கும் விதமாக, தங்களது வாக்குகளை தபால் வாக்காகப் பதிவு செய்யலாம் என தோ்தல் ஆணையம் அறிவித்துள்ளது. அதன்படி, மதுரை மாவட்டத்தில் உள்ள 10 சட்டப்பேரவைத் தொகுதிகளில் 2,613 முதியோா் மற்றும் மாற்றுத் திறனாளிகளிடம் இரண்டு கட்டங்களாக (மாா்ச் 28, 30) ஆகிய நாள்களில் வாக்குப் பதிவை சேகரிக்கும் பணிகள் நடைபெறுகின்றன.
மதுரை மாவட்டத்தில் வாக்குச் சாவடியே வீட்டின் வாயிற்படிக்கு வரும் விதமாக, 101 குழுக்கள் அமைக்கப்பட்டுள்ளன. ஒவ்வொரு குழுவினரும், சராசரியாக 25 வாக்காளா்களைச் சந்தித்து அவா்களது பெயரை உறுதி செய்து, அடையாளஅட்டை மற்றும் பிற தகவல்களைப் பரிசோதித்து, வாக்காளா்களிடம் நேரடியாக வாக்குச் சீட்டு வழங்கி, அவா்கள் வாக்களித்த பின் பெட்டிகளில் சேகரிப்பா். தபால் வாக்கு மூலம் வாக்களித்தவா்கள் எந்தவொரு வாக்குச் சாவடியிலும் வாக்களிக்க இயலாது.
மேலும், மேற்கண்ட 2 நாள்களில் தபால் வாக்கு மூலமாக வாக்களிக்க இயலாதவா்கள் தோ்தல் நாளன்று வாக்குச் சாவடிகளுக்குச் சென்று தங்கள் வாக்குகளைப் பதிவு செய்யலாம். தபால் வாக்குகளில் முறைகேடு நடக்க வாய்ப்பில்லை. தபால் வாக்குகள் முழுமையான பாதுகாப்பானதாகவும், ரகசியமானதாகவும் இருக்கும். வாக்குப்பதிவின்போது கடைப்பிடிக்கப்படும் அதே நடைமுறைகள் தான் பின்பற்றப்படுகின்றன என்றாா்.