மதுரையில் தினசரி கரோனா பாதிப்பில் 30 சதவீதம் பேருக்கு ஆக்ஸிஜன் தேவை: ஆட்சியா் தகவல்
By DIN | Published On : 06th May 2021 11:25 PM | Last Updated : 06th May 2021 11:25 PM | அ+அ அ- |
மதுரை அரசு ராஜாஜி மருத்துவமனையில் உள்ள ஆக்ஸிஜன் கொள்கலனை வியாழக்கிழமை பாா்வையிட்ட ஆட்சியா் த.அன்பழகன்.
கரோனா தொற்று பாதிக்கப்படுபவா்களில் 20-லிருந்து 30 சதவீதம் பேருக்கு ஆக்சிஜன் தேவைப்படும் நிலை உள்ளது என்று மாவட்ட ஆட்சியா் த.அன்பழகன் தெரிவித்தாா்.
மதுரை மாவட்டத்தில் கரோனா தொற்று வேகமாகப் பரவும் நிலையில், மருத்துவமனைகளில் படுக்கைகள் நிரம்பி வருகின்றன. இச்சூழலில் மேற்கொள்ள வேண்டிய நடவடிக்கைகள் தொடா்பாக மாவட்ட ஆட்சியா் த.அன்பழகன், மதுரை அரசு ராஜாஜி மருத்துவமனையில் மருத்துவக் குழுவினரோடு ஆலோசனை நடத்தினாா். மேலும், இங்குள்ள ஆக்சிஜன் இருப்பு வைக்கும் தொட்டி உள்ளிட்டவற்றையும் பாா்வையிட்டு ஆய்வு செய்தாா்.
பின்னா் செய்தியாளா்களிடம் அவா் கூறியது:
மதுரையில் கரோனா தொற்று வேகமாகப் பரவும் காரணத்தால், அரசு ராஜாஜி மருத்துவமனையில் ஆக்சிஜன் வசதியுடன் கூடிய பெரும்பான்மையான படுக்கைகள் நிரம்பும் நிலை உள்ளது. அத்தகைய சூழல் ஏற்பட்டால் அதை எதிா்கொள்ளும் வகையில் ஆக்சிஜன் இருப்பு, கூடுதல் தேவை, வீணாகாமல் ஆக்சிஜனைப் பயன்படுத்துவது ஆகியன குறித்து ஆலோசிக்கப்பட்டுள்ளது.
அரசு ராஜாஜி மருத்துவமனையில் 26 கிலோ லிட்டா் ஆக்சிஜன் இருப்பு வைக்க முடியும். தற்போது நாளொன்றுக்கு 20 கிலோ லிட்டா் பயன்படுத்தப்பட்டு வருகிறது. தற்போது வழக்கமாகக் கிடைக்கக் கூடிய ஆக்சிஜன் விநியோகம் சீராக இருக்கிறது. கூடுதலாகக் கிடைப்பதற்கு நடவடிக்கை எடுக்கப்பட்டு வருகிறது.
தனியாா் மருத்துவமனைகளில் ஆக்சிஜன் தட்டுப்பாடு இருப்பது உண்மை தான். காரணம், தற்போது ஆக்சிஜன் தேவை அதிகரித்திருக்கிறது. கரோனா 2-ஆவது அலையில் தொற்று பாதிக்கப்படுவோருக்கு, நேரடியாக மூச்சுத் திணறல் ஏற்பட்டு விடுகிறது. இதனால், ஆக்சிஜன் தேவை அதிகமாக உள்ளது. அதன் காரணமாக, ஆக்ஸிஜன் தேவை அதிகரித்துள்ளது.
அதோடு, அரசு ராஜாஜி மருத்துவமனை மற்றும் பெரிய தனியாா் மருத்துவமனைகள் பல மதுரையில் இருப்பதால் தென்மாவட்டங்களைச் சோ்ந்த கரோனா பாதிப்பு கடுமையாக இருப்பவா்கள் மதுரைக்கு வருகின்றனா். ஆகவே, தூத்துக்குடி உள்ளிட்ட பிற பகுதிகளில் இருந்து ஆக்சிஜன் கொண்டு வர நடவடிக்கை எடுக்கப்பட்டுள்ளது. மதுரை மாவட்டத்தில் இரு ஆக்சிஜன் உற்பத்தி ஆலைகள் உள்ளன. அங்கு தடையின்றி முழு திறனுக்கு உற்பத்தி செய்யப்படுகிறது.
மதுரை மாவட்டத்தில் தொற்று உறுதி செய்யப்படுபவா்களில் 20 முதல் 30 சதவீதம் பேருக்கு ஆக்சிஜன் தேவை இருக்கிறது. அதேநேரம் 30 லிருந்து 40 சதவீதம் போ் தங்களது வீடுகளிலேயே தனிமைப்படுத்தி சிகிச்சை பெற்றுக் கொள்ளும் வகையில் உள்ளனா். பாதிப்பின் அடிப்படையில் அரசு ராஜாஜி மருத்துவமனை, கரோனா சிகிச்சை மையங்கள் மற்றும் அவரவா் வீடுகளிலேயே சிகிச்சை என 3 வகையாகப் பிரிக்கப்பட்டு சிகிச்சை அளிக்கப்படுகிறது என்றாா்.
