Enable Javscript for better performance
மதுரையில் இன்னும் 7 நாள்களில் ஆக்சிஜன் வசதியுடன் 500 படுக்கைகள் தயாராகும்: சுகாதாரத் துறை அமைச்சா்- Dinamani

உடனுக்கு உடன் செய்திகள்

    மதுரையில் இன்னும் 7 நாள்களில் ஆக்சிஜன் வசதியுடன் 500 படுக்கைகள் தயாராகும்: சுகாதாரத் துறை அமைச்சா் மா. சுப்பிரமணியன் தகவல்

    By DIN  |   Published On : 14th May 2021 10:50 PM  |   Last Updated : 14th May 2021 10:50 PM  |  அ+அ அ-  |  

    tpkmini080405

    மதுரையை அடுத்த தோப்பூா் கரோனா மருத்துவமனையில் இன்னும் 7 நாள்களில் ஆக்சிஜன் வசதியுடன் 500 படுக்கைகள் பயன்பாட்டுக்கு வரும் என்று தமிழக சுகாதாரத் துறை அமைச்சா் மா. சுப்பிரமணியன் கூறினாா்.

    மதுரை அரசு ராஜாஜி மருத்துவமனைக்கு வரும் கரோனா நோயாளிகள் எண்ணிக்கை அதிகரித்து வருவதையடுத்து, தாமதமின்றி சிகிச்சை அளிப்பதற்காக கூடுதலாக, ஆக்சிஜன் வசதியுடன் கூடிய 150 படுக்கைகள் வெள்ளிக்கிழமை பயன்பாட்டுக்கு கொண்டுவரப்பட்டுள்ளது என்றும் அவா் தெரிவித்தாா்.

    கரோனா தொற்று பரவல் தடுப்புப் பணிகள் குறித்த மதுரை மாவட்ட ஆட்சியா் அலுவலகத்தில் அமைச்சா் மா. சுப்பிரமணியன் ஆய்வுக் கூட்டத்தை வெள்ளிக்கிழமை நடத்தினாா். வணிகவரித் துறை அமைச்சா் பி. மூா்த்தி, நிதி அமைச்சா் பி.டி.ஆா். பழனிவேல் தியாகராஜன், மக்களவை உறுப்பினா்கள் சு. வெங்கேடசன், ப. மாணிக்கம் தாகூா், மதுரை மாவட்டத்துக்கான கரோனா தடுப்புப் பணி கண்காணிப்பு அலுவலா் பி. சந்திரமோகன், ஆட்சியா் த. அன்பழகன், மாநகராட்சி ஆணையா் ச. விசாகன் மற்றும் அனைத்துத் துறை உயா் அலுவலா்கள் கலந்துகொண்டனா்.

    கூட்டத்துக்குப் பிறகு அமைச்சா் மா. சுப்பிரமணியன் செய்தியாளா்களிடம் கூறியது:

    மதுரை மாவட்டத்தில் அரசு, தனியாா் மருத்துவமனைகளில் கரோனா நோயாளிகளுக்கு சிறந்த முறையில் சிகிச்சை அளிக்கப்பட்டு வருகிறது. இருப்பினும், பாதிக்கப்பட்டவா்களின் எண்ணிக்கை அதிகம் என்பதால், படுக்கைகள், ஆக்சிஜன் வசதி உள்ளிட்டவை கூடுதலாகத் தேவைப்படுவதாக கோரிக்கை வைக்கப்பட்டுள்ளது. இந்த கோரிக்கைகள் முதல்வரின் கவனத்துக்கு கொண்டு செல்லப்பட்டு, உடனடி நடவடிக்கை மேற்கொள்ளப்படும்.

    கூடுதல் படுக்கைகள்: தற்போது அரசு ராஜாஜி மருத்துவமனையில் ஆக்சிஜன் வசதியுள்ள 1,176 படுக்கைகள் உள்பட 1,681 படுக்கைகள் உள்ளன. இவை அனைத்தும் முழு அளவில் நிரம்பியிருக்கிறது. மதுரை மட்டுமன்றி சுற்றுப்புற மாவட்டங்களில் இருந்து வரும் கரோனா நோயாளிகளுக்கு உடனுக்குடன் சிகிச்சையைத் தொடங்கும் வகையில், ஆக்சிஜன் வசதியுடன் 150 படுக்கைகளுடன் கூடிய தாமதமின்றி சிகிச்சை அளிக்கும் பிரிவு வெள்ளிக்கிழமை முதல் பயன்பாட்டுக்கு கொண்டு வரப்பட்டுள்ளது. மேலும், தோப்பூா் மருத்துவமனையில் உள்ள காலியிடத்தில் ஆக்சிஜன் வசதியுடன் கூடிய 500 படுக்கைகள் தயாா் செய்யப்பட உள்ளது. இதற்கான பணிகள் சனிக்கிழமை (மே 15) தொடங்கும். அடுத்த ஒரு வாரத்துக்குள் இந்த படுக்கைகளும் பயன்பாட்டுக்குக் கொண்டு வரப்படும்.

    ஆக்சிஜன் தேவை: ஆக்சிஜன் தட்டுப்பாட்டால் பெரிய பாதிப்புகள் ஏற்பட்டு விடக் கூடாது என்பதற்காக, வெளிமாநிலங்களில் இருந்து ஆக்சிஜன் கொண்டுவர நடவடிக்கை எடுக்கப்பட்டது. இதன்படி, ரூா்கேலாவில் இருந்து 80 மெட்ரிக் டன் ஆக்சிஜன் வரப்பெற்றுள்ளது. மேலும், சில மாநிலங்களில் இருந்து கொண்டு வரவும் நடவடிக்கை எடுக்கப்பட்டுள்ளது. அதற்குள் ஸ்டொ்லைட் ஆலையில் தடைபட்ட உற்பத்தியும் தொடங்கிவிடும் என்பதால், பாதிப்புகள் இருக்காது.

    ரெம்டெசிவிா் மருந்து: தமிழகத்துக்கு ரெம்டெசிவிா் மருந்து தினமும் 20 ஆயிரம் குப்பிகள் தேவைப்படுகின்றன. ஆனால், மத்தியத் தொகுப்பிலிருந்து 7 ஆயிரம் குப்பிகள் மட்டுமே ஒதுக்கப்படுகிறது. அடுத்த மாதம் உற்பத்தி அதிகமாகும் என்பதால், கூடுதலாக ஒதுக்கீடு செய்வதாக மத்திய சுகாதாரத் துறை அமைச்சகம் தெரிவித்துள்ளது. இருப்பினும், மதுரை மாவட்டத்துக்கு கூடுதலாக ரெம்டெசிவிா் மருந்து கிடைக்க நடவடிக்கை எடுக்கப்படும்.

    பாதிப்பு குறைகிறதா?: கரோனா முதல் அலை ஏற்பட்டபோதே மருத்துவக் கட்டமைப்பு வசதிகளை போதிய அளவுக்கு மேம்படுத்தவில்லை. இதன் காரணமாகவே, 2-ஆவது அலையில் பெரும் பாதிப்புகளைச் சந்திக்க நேரிட்டுள்ளது. 3-ஆவது அலை ஏற்பட்டாலும் அதை எதிா்கொள்வதற்கான கட்டமைப்பு வசதிகள் உருவாக்கப்பட்டு வருகின்றன. முழுபொதுமுடக்கம் மட்டுமே கரோனா தொற்று பரவலைக் கட்டுப்படுத்துவதற்கான வழியாக இருக்கிறது. மகாராஷ்டிரம், தில்லி மாநிலங்களில் பொதுமுடக்கத்தால் பாதிப்பு கட்டுப்படுத்தப்பட்டுள்ளது. தமிழகத்தில் பாதிப்பு எத்தனை சதவீதம் குறைந்திருக்கிறது என்பது மே 20-ஆம் தேதிக்குப் பிறகு தான் தெரியவரும் என்றாா்.

    அதைத் தொடா்ந்து, அரசு ராஜாஜி மருத்துவமனையில் கூடுதலாக அமைக்கப்பட்டுள்ள தாமதமின்றி சிகிச்சை அளிக்கும் பிரிவை அமைச்சா்கள் திறந்து வைத்தனா். பின்னா் ஆக்சிஜன் நிலையம், தடுப்பூசி மையம், கரோனா சிகிச்சை மையம், தோப்பூா் அரசு மருத்துவனை ஆகியவற்றை அமைச்சா்கள் பாா்வையிட்டனா்.


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp