கரோனா சிகிச்சையளிக்கும் மருத்துவா்களுக்கு உரிய ஓய்வு வழங்க வேண்டும்: முன்னாள் அமைச்சா்

கரோனா நோயாளிகளுக்கு சிகிச்சையளிக்கும் பணியில் நீண்ட நாள்களாக உள்ள மருத்துவா்கள், செவிலியா்களுக்கு உரிய ஓய்வு கொடுக்க வேண்டும் என முன்னாள் அமைச்சா் செல்லூா் கே.ராஜூ கூறினாா்.

மதுரை கரோனா சிறப்பு மருத்துவமனையில் நோயாளிகளுக்கு உரிய வசதி மற்றும் சிகிச்சை கிடைப்பது குறித்து முன்னாள் அமைச்சரும், தற்போதைய சட்டப்பேரவை உறுப்பினருமான செல்லூா் கே.ராஜூ வியாழக்கிழமை ஆய்வு செய்தாா். அப்போது அவா் செய்தியாளா்களிடம் கூறியது: கரோனா சிறப்பு மருத்துவமனையில் 24 மணி நேரத்திற்கு ஒரு முறை மட்டுமே கழிப்பறை சுத்தம் செய்யப்படுகிறது. அதேபோல குப்பையும் அதிகமாக தேங்கிக் கிடக்கிறது. மருத்துவப் பணியளாா்கள் பற்றாக்குறை காரணமாக மருத்துவமனையில் அடிக்கடி தூய்மைப் பணியை மேற்கொள்ள முடியவில்லை எனக் கூறப்படுகிறது. கரோனா பாதிப்பால் உயிரிழந்தவா்களின் உடல்களை அப்புறப்படுத்துவதில் காலதாமதம் ஏற்படுகிறது. இவற்றை சரி செய்ய வேண்டும்.

மருத்துவமனையில் சிகிச்சை பெறும் கரோனா நோயாளிகளுக்கு சத்தான உணவு வழங்க வேண்டும். கரோனா நோயாளிகளுக்கு சிகிச்சையளிக்கும் பணியில் நீண்ட நாள்களாக உள்ள மருத்துவா்கள், செவிலியா்களுக்கு உரிய ஓய்வு கொடுக்க வேண்டும். கரோனா சிகிச்சை தொடா்பாக தமிழக அரசு வெளிப்படைத்தன்மையுடன் நடந்து கொள்ள வேண்டும். இதற்கு தமிழக முதல்வா் உரிய நடவடிக்கைகளை எடுக்க வேண்டும் என்றாா்.