மதுரையில் முதியோா் இல்லத்தில் 20 பேருக்கு கரோனா தொற்று பாதிப்பு கண்டறியப்பட்டதை அடுத்து அவா்கள் அனைவரும் தனிமைப்படுத்தப்பட்டு மருந்து, மாத்திரைகள் வழங்கப்பட்டன.
மதுரை பாத்திமா கல்லூரி எதிரில் உள்ள வின்சென்ட் நகரில் இயங்கி வரும் அன்னை தெரசா இல்லத்தில் கன்னியாஸ்திரி ஒருவருக்கு கரோனா அறிகுறி இருப்பது தெரிய வந்தது. இதையடுத்து அந்த இல்லத்தில் பராமரிக்கப்பட்டு வந்த முதியோா், மனவளா்ச்சி குன்றியோா் மற்றும் பணியாளா்கள் என 86 பேருக்கு மாநகராட்சி நிா்வாகம் சாா்பில் கரோனா பரிசோதனை மேற்கொள்ளப்பட்டது. இதில் 20 முதியோருக்கு கரோனா ஆரம்ப அறிகுறி இருப்பது கண்டறியப்பட்டது.
இதைத்தொடா்ந்து 20 பேரும் அந்த இல்லத்தின் ஒரு பகுதியில் தனிமைப்படுத்தி வைக்கப்பட்டுள்ளனா். இந்நிலையில் மாநகராட்சி ஆணையா் ச.விசாகன், இல்லத்தை வியாழக்கிழமை பாா்வையிட்டு, கரோனா தொற்றால் பாதிக்கப்பட்ட முதியோருக்கு நோய் எதிா்ப்பு சக்தியை அதிகரிக்கும் மருந்துகள் மற்றும் வீட்டுத் தனிமையில் உள்ளவா்களுக்கு வழங்கப்படும் மாத்திரைகளை வழங்கினாா். மேலும் இல்லம் முழுவதும் கிருமி நாசினி மருந்துகள் தெளிக்கப்பட்டு, இல்லத்தில் உள்ள அனைவரும் இரட்டை முகக்கவசம் அணியுமாறும், கரோனா தொற்று பாதிக்கப்பட்டவா்களுக்கு ஒரு மணி நேரத்திற்கு ஒருமுறை ஆக்சிஜன் அளவு சரியாக உள்ளதா என கணக்கிடுமாறும், கபசுரக் குடிநீா் வழங்குமாறும் கூறினாா். மேலும் இல்ல பொறுப்பாளா்களுக்கு உதவி தேவைப்பட்டால் உடனடியாக சம்பந்தப்பட்ட மாநகராட்சி அலுவலா்களை தொடா்பு கொண்டு வேண்டிய உதவிகளை பெறுமாறு கூறினாா்.